ఇరుముడికి టాక్సిక్ సమస్య?

మాస్ మహారాజా రవితేజ నటించిన తాజా చిత్రం ‘ఇరుముడి’ ప్రేక్షకుల ముందుకు వచ్చి పాజిటివ్ టాక్ సొంతం చేసుకుంటోంది. చాలా కాలంగా సరైన విజయాన్ని కోరుకుంటున్న అభిమానులకు ఈ సినిమా మంచి ఉత్సాహాన్ని ఇచ్చింది. తొలి ఆట నుంచే ప్రేక్షకుల నుంచి స్పందన రావడంతో బాక్సాఫీస్ వద్ద కూడా సినిమా జోరు చూపించే అవకాశాలు కనిపిస్తున్నాయి. రవితేజ కెరీర్‌లోనే బిగ్గెస్ట్ ఓపెనింగ్స్ అందుకునే దిశగా ‘ఇరుముడి’ అడుగులు వేస్తోందని ట్రేడ్ వర్గాల్లో చర్చ జరుగుతోంది. ఇదే ఊపు కొనసాగితే ఈ సినిమా మరో భారీ విజయంగా నిలిచే అవకాశముంది.

అయితే ‘ఇరుముడి’ వసూళ్లకు ఓ చిన్న సమస్య ఎదురుకానుంది. కేవలం నాలుగు రోజుల వ్యవధిలోనే, ఈ నెల 26న యశ్ నటిస్తున్న ‘టాక్సిక్’ థియేటర్లలోకి రానుంది. పాన్ ఇండియా స్థాయిలో భారీ అంచనాలున్న ఈ సినిమాకు తెలుగులోనూ ఎక్కువ థియేటర్లు దక్కే అవకాశం ఉంది. పూర్తి స్థాయి యాక్షన్, యువతను ఆకట్టుకునే అంశాలతో ‘టాక్సిక్’ వస్తుండటంతో పోటీ పెరగనుంది. అయితే కుటుంబ ప్రేక్షకులు మాత్రం ‘ఇరుముడి’ వైపు మొగ్గు చూపే అవకాశం ఉంది. అందుకే ఈ నాలుగు రోజుల్లోనే ‘ఇరుముడి’ వీలైనంత ఎక్కువ వసూళ్లు సాధించడం కీలకంగా మారింది.