మహిళల ఆబ్జెక్టిఫికేషన్‌పై కాయదు లోహర్ ఫైర్

కోలీవుడ్ యంగ్ బ్యూటీ కాయదు లోహర్ ప్రస్తుతం ‘ది ప్యారడైజ్’, ‘ఇమ్మోర్టల్’, సూర్య-48 వంటి చిత్రాలతో బిజీగా ఉన్నారు. ఆమె నటించిన రొమాంటిక్ లవ్ అండ్ సస్పెన్స్ థ్రిల్లర్ ‘ఇమ్మోర్టల్’ తాజాగా థియేటర్లలోకి వచ్చింది. ఈ సినిమా ప్రమోషన్స్‌లో భాగంగా ఓ ఇంటర్వ్యూలో కాయదు లోహర్.. చిత్ర పరిశ్రమలో మహిళలను చూపించే తీరుపై సంచలన వ్యాఖ్యలు చేశారు. ‘ఇమ్మోర్టల్’ ట్రైలర్‌లో కెమెరా ముఖం నుంచి పెదవుల వైపు జూమ్ చేసే విజువల్స్ గురించి అడిగిన ప్రశ్నకు స్పందిస్తూ, మహిళలను కేవలం వస్తువులుగా చూపించడాన్ని తాను ఎప్పటికీ అంగీకరించనని స్పష్టం చేశారు.

కథకు నిజంగా అవసరమై, పాత్రకు ప్రాధాన్యత ఉన్నప్పుడు మాత్రమే పరిమిత స్థాయిలో అలాంటి సన్నివేశాలను అంగీకరించవచ్చని కాయదు తెలిపారు. అయితే ప్రేక్షకులను ఆకర్షించడం లేదా ఇన్‌స్టాగ్రామ్, సోషల్ మీడియాలో ట్రెండ్ అవ్వడం కోసం హీరోయిన్లను అలా చూపించడాన్ని తాను తీవ్రంగా వ్యతిరేకిస్తానన్నారు. ఇలాంటి విజువల్స్ తనను అసౌకర్యానికి గురిచేస్తాయని, వాటికి ఎప్పటికీ అంగీకరించనని చెప్పారు. పరిశ్రమలో ఇలాంటి పద్ధతులపై ఒక్కరు గళం విప్పి పోరాడటం కష్టమని, మిగిలిన వారు ‘ఇది ఎప్పటి నుంచో ఇలాగే ఉంది’ అంటూ ఆ విషయాన్ని కొట్టిపారేస్తారని ఆవేదన వ్యక్తం చేశారు. గతంలో మహిళల చిత్రీకరణపై విమర్శలు, వివాదాలు ఎదుర్కొన్న ‘పెద్ది’ సినిమాను కూడా ఆమె ఉదాహరణగా ప్రస్తావించారు.