‘నేను రెడీ’ నుంచి ‘కొంచెం కొంచెం’ పాట విడుదల

హవీష్ హీరోగా, త్రినాథరావు నక్కిన దర్శకత్వంలో తెరకెక్కుతున్న ‘నేను రెడీ’ చిత్రంలోని తొలి రొమాంటిక్ మెలోడీ ‘కొంచెం కొంచెం’ పాటను చిత్రబృందం విడుదల చేసింది. మిక్కీ జే మేయర్ స్వరపరిచిన ఈ పాటకు రామజోగయ్య శాస్త్రి సాహిత్యం అందించగా, సమీరా భరద్వాజ్ ఆలపించారు. కథానాయిక కావ్యా థాపర్‌తో పాటు బాలీవుడ్ నటి నర్గీస్ ఫక్రీ ప్రత్యేక ఆకర్షణగా కనిపించారు. హవీష్–కావ్యా మధ్య కెమిస్ట్రీ, సంగీతం, విజువల్స్ ప్రేక్షకులను ఆకట్టుకుంటున్నాయి.

సాంగ్ లాంచ్ కార్యక్రమంలో దర్శకుడు బాబీ కొల్లి మాట్లాడుతూ హవీష్‌కు సినిమాపై అపారమైన ప్యాషన్ ఉందని, ‘నేను రెడీ’ ఘన విజయం సాధించాలని ఆకాంక్షించారు. హవీష్ మాట్లాడుతూ ఈ చిత్రం తన కెరీర్‌లోనే బెస్ట్ మూవీ అవుతుందని నమ్మకం వ్యక్తం చేశారు. దర్శకుడు త్రినాథరావు నక్కిన ఇది పూర్తి స్థాయి ఫ్యామిలీ ఎంటర్‌టైనర్ అని తెలిపారు. త్వరలో విడుదల తేదీని ప్రకటిస్తామని చిత్రబృందం వెల్లడించింది.