పేరెంట్స్ ఇచ్చిన ధైర్యమే నా బలం: ప్రీతి

విలక్షణమైన పాత్రలను ఎంచుకుంటూ టాలీవుడ్, కోలీవుడ్ ప్రేక్షకులకు దగ్గరైన ప్రీతి ముకుందన్, తన నటనా ప్రయాణానికి సంబంధించిన ఆసక్తికర విషయాలను పంచుకున్నారు. గతేడాది విడుదలైన ‘బ్లాస్ట్’ చిత్రంతో మంచి గుర్తింపు తెచ్చుకున్న ఆమె, ప్రస్తుతం వరుస అవకాశాలతో బిజీగా ఉన్నారు. ‘అన్బి అవన్’, ‘దశమకన్’ వంటి చిత్రాల్లో నటిస్తున్న ప్రీతి, తమ కుటుంబంలో ఎప్పుడూ చదువుకే తొలి ప్రాధాన్యత ఉండేదని తెలిపారు.

18 ఏళ్ల వయసులో మోడలింగ్ చేస్తున్న సమయంలో వచ్చిన ఆడిషన్ అవకాశాన్ని నటనపై ఉన్న భయంతో తొలుత తిరస్కరించాలని భావించినట్లు ప్రీతి వెల్లడించారు. అయితే తన తల్లిదండ్రులు ధైర్యం చెప్పి ప్రయత్నించమని ప్రోత్సహించడంతో ఆడిషన్ ఇచ్చానని తెలిపారు. తొలి అవకాశం దక్కకపోయినా, అదే అనుభవం తనలో సినిమాలపై ప్రేమను పెంచిందని చెప్పారు. తల్లిదండ్రులు ఇచ్చిన ఆ చిన్న ప్రేరణే నేడు తనను విజయవంతమైన నటిగా నిలబెట్టిందని ఆమె ఆనందం వ్యక్తం చేశారు.