సీనియర్ స్టార్‌తో పొలిమేర 3 కొత్త అప్‌డేట్

ఎలాంటి భారీ అంచనాలు లేకుండా నేరుగా ఓటీటీలో విడుదలై ప్రేక్షకుల నుంచి మంచి ఆదరణ పొందిన చిత్రాల్లో ‘మా ఊరి పొలిమేర’ ఒకటి. డాక్టర్ అనిల్ విశ్వనాథ్ దర్శకత్వంలో తెరకెక్కిన ఈ చిత్రంలో సత్యం రాజేష్, బాలాదిత్య, కామాక్షి భాస్కర్ల, గెటప్ శ్రీను కీలక పాత్రలు పోషించారు. సినిమా విజయంతో దీనికి సీక్వెల్‌గా ‘మా ఊరి పొలిమేర 2’ రూపొందించి థియేటర్లలో విడుదల చేయగా, అది కూడా బాక్సాఫీస్ వద్ద మంచి విజయాన్ని అందుకుంది.

ప్రస్తుతం ‘మా ఊరి పొలిమేర 3’ నిర్మాణ దశలో ఉండగా, ఈ సినిమాపై ప్రేక్షకుల్లో భారీ అంచనాలు నెలకొన్నాయి. తాజా సమాచారం ప్రకారం ఈ చిత్రంలో సీనియర్ నటుడు అర్జున్ సర్జ కీలక పాత్రలో కనిపించనున్నట్లు సినీ వర్గాల్లో ప్రచారం జరుగుతోంది. అర్జున్ సర్జ వంటి స్టార్ నటుడు భాగం కావడం సినిమాకు మరింత హైప్ తీసుకురావచ్చని సినీ విశ్లేషకులు అభిప్రాయపడుతున్నారు.