సూర్య ‘విశ్వనాథ్‌ అండ్‌ సన్స్‌’పై పరుచూరి గోపాలకృష్ణ రివ్యూ

ప్రముఖ రచయిత పరుచూరి గోపాలకృష్ణ సూర్య హీరోగా నటించిన ‘విశ్వనాథ్‌ అండ్‌ సన్స్‌’ సినిమాపై తన అభిప్రాయాలను పంచుకున్నారు. ‘పరుచూరి పలుకులు’లో భాగంగా ఈ చిత్రాన్ని విశ్లేషించిన ఆయన, నటీనటుల ప్రదర్శనలను ప్రశంసించారు. అయితే, కథనం, ఎడిటింగ్‌లో కొన్ని మార్పులు చేసి ఉంటే సినిమా మరింత ప్రభావవంతంగా ఉండేదని అభిప్రాయపడ్డారు. ఒక కథలో మరో కథను చూపించేలా ఎడిటర్‌ నవీన్‌ నూలి చేసిన ప్రయోగాన్ని ఆయన మెచ్చుకున్నారు. అదే సమయంలో, 161 నిమిషాల నిడివి ఉన్న ఈ చిత్రాన్ని కొన్ని సన్నివేశాలు తొలగించి సుమారు 130 నిమిషాలకు పరిమితం చేసి ఉంటే బాగుండేదని పేర్కొన్నారు.

కథలో హీరోకు పెళ్లిపై ఉన్న అభిప్రాయాలు, తనకంటే 20 ఏళ్లు చిన్నదైన యువతితో అతని సంబంధం ప్రధాన అంశాలుగా నిలుస్తాయని పరుచూరి వివరించారు. సరోగసీ ద్వారా బిడ్డను కనడం కోసం ఆ యువతి హీరోకు సహకరించడం, ఆ తర్వాత అతని ఇంట్లో ఉండే సన్నివేశాలు బాగున్నాయని అన్నారు. అయితే, హీరో తన తండ్రి రెండో భార్య ఇంటికి వెళ్లి ఆమె సమస్యలను పరిష్కరించే ఎపిసోడ్‌ కథకు అంతగా అవసరం లేదని అభిప్రాయపడ్డారు. ఆ సన్నివేశాలను తొలగించి, తొలి భాగంలోనూ కొన్ని మార్పులు చేసి ఉంటే సినిమా మరింత గొప్పగా నిలిచేదని పేర్కొన్నారు. మరోవైపు, క్లైమాక్స్‌లో హీరోయిన్‌ విదేశాలకు వెళ్లడం, ఆ తర్వాతి సంవత్సరాలను వేగవంతమైన సన్నివేశాల ద్వారా చూపించడం ప్రేక్షకులపై భావోద్వేగ ప్రభావాన్ని చూపించాయని ప్రశంసించారు.