ఫ్రాన్స్‌లో రాజమౌళికి అరుదైన గౌరవం

దర్శకధీరుడు ఎస్.ఎస్. రాజమౌళికి ఫ్రాన్స్ పర్యటన సందర్భంగా అరుదైన అంతర్జాతీయ గౌరవం లభించింది. ప్రస్తుతం మహేష్ బాబుతో రూపొందిస్తున్న ప్రతిష్టాత్మక చిత్ర పనుల్లో బిజీగా ఉన్న రాజమౌళికి, ఫ్రాన్స్‌లోని ప్రముఖ ఆర్ట్స్ సెంటర్ సినిమాటిక్ ఫ్రాంచైజ్‌లోని హెన్రీ లాంగ్లోయిస్ హాల్‌లో ఆయన పేరుతో శాశ్వత సీటును కేటాయించారు. ప్రపంచ సినీ రంగానికి ఆయన అందించిన సేవలకు గుర్తింపుగా ఈ గౌరవాన్ని అందించారు.

ఈ గౌరవాన్ని ప్రముఖ ఫ్రెంచ్ దర్శకుడు, ఆస్కార్ విజేత కోస్టా-గావ్రాస్ సమక్షంలో రాజమౌళి స్వీకరించారు. ఈ అరుదైన గుర్తింపు తనకు ఊహించని గౌరవమని రాజమౌళి సోషల్ మీడియా ద్వారా ఆనందం వ్యక్తం చేశారు. ఆయనకు లభించిన ఈ అంతర్జాతీయ గుర్తింపుపై సినీ ప్రముఖులు, అభిమానులు హర్షం వ్యక్తం చేస్తున్నారు.