రాజమౌళి విజన్‌ అద్భుతం.. శ్రియ శరణ్ ప్రశంసల వర్షం

ఒకప్పుడు దక్షిణాది చిత్ర పరిశ్రమలో అగ్ర కథానాయికగా రాణించిన శ్రియ శరణ్ ప్రస్తుతం వైవిధ్యమైన పాత్రలను ఎంచుకుంటూ సెకండ్ ఇన్నింగ్స్‌లోనూ ఆకట్టుకుంటున్నారు. హీరోయిన్‌గా అవకాశాలు తగ్గినప్పటికీ, కథకు ప్రాధాన్యం ఉన్న పాత్రలను ఎంపిక చేసుకుంటూ నటిగా తన ప్రత్యేకతను కొనసాగిస్తున్నారు. ప్రస్తుతం చంద్రయాన్‌ నేపథ్యంలో తెరకెక్కుతున్న ఓ ప్రతిష్ఠాత్మక వెబ్ సిరీస్‌లో యామిని ముడలియార్ అనే శక్తివంతమైన పాత్రలో నటిస్తున్నట్లు సమాచారం.

తాజా ఇంటర్వ్యూలో శ్రియ శరణ్ సౌత్ ఫిల్మ్ ఇండస్ట్రీతో తన అనుబంధం గురించి మాట్లాడుతూ, ఈ పరిశ్రమ తనకు ఎంతో ప్రేమ, ఆదరణ అందించిందని తెలిపారు. నటిగా తనను తీర్చిదిద్దడంలో సౌత్ ఇండస్ట్రీ కీలక పాత్ర పోషించిందన్నారు. దర్శకధీరుడు ఎస్.ఎస్. రాజమౌళి గురించి మాట్లాడుతూ.. ఆయన విజన్, షూటింగ్ సమయంలో చూపించే అంకితభావం అద్భుతమని ప్రశంసించారు. ఎంతటి పెద్ద ఆలోచననైనా గొప్ప సినిమాటిక్ అనుభవంగా మలిచే అరుదైన సామర్థ్యం రాజమౌళికి ఉందని శ్రియ కొనియాడారు.