చరణ్, సుకుమార్ ప్రాజెక్ట్‌కు ముహూర్తం ఖరారు?

మెగాపవర్ స్టార్ రామ్ చరణ్, దర్శకుడు సుకుమార్ కాంబినేషన్‌లో తెరకెక్కనున్న కొత్త సినిమాపై భారీ అంచనాలు నెలకొన్నాయి. చరణ్ ఇటీవల నటించిన పెద్ది సినిమాకు మంచి స్పందన రావడంతో ఈ ప్రాజెక్ట్‌పై ఆసక్తి మరింత పెరిగింది. పెద్ది చిత్రాన్ని సుకుమార్ శిష్యుడు బుచ్చిబాబు సానా తెరకెక్కించగా, ఇప్పుడు ఆయన గురువు సుకుమార్‌తో కలిసి చరణ్ మరో భారీ చిత్రానికి సిద్ధమవుతున్నారు. ఈ సినిమా ఎప్పుడు ప్రారంభమవుతుందనే విషయంపై ఇప్పటివరకు అభిమానుల్లో ఆసక్తి కొనసాగింది.

తాజాగా ఈ సందేహానికి తెరపడినట్టు సమాచారం. రామ్ చరణ్, సుకుమార్ సినిమాను ఈ ఏడాది దసరా సందర్భంగా ముహూర్త కార్యక్రమాలతో అధికారికంగా ప్రారంభించేందుకు సన్నాహాలు చేస్తున్నట్టు తెలుస్తోంది. దీంతో త్వరలోనే ప్రాజెక్ట్ ప్రారంభంపై స్పష్టమైన ప్రకటన వచ్చే అవకాశం ఉంది. భారీ స్థాయిలో కథను రూపొందిస్తున్న సుకుమార్, సినిమాను అత్యంత ప్రతిష్టాత్మకంగా తెరకెక్కించనున్నారు. మైత్రి మూవీ మేకర్స్ నిర్మిస్తున్న ఈ చిత్రానికి నవంబర్ నుంచి రెగ్యులర్ షూటింగ్ ప్రారంభించే అవకాశం ఉందని సినీ వర్గాల్లో ప్రచారం జరుగుతోంది.