ప్రపంచవ్యాప్తంగా ‘రామాయణం’ సందడి.. 40 భాషల్లో విడుదలకు సన్నాహాలు!

భారతీయ ఇతిహాసం ‘రామాయణం’ ఆధారంగా నమిత్ మల్హోత్రా నిర్మాణంలో, నితీష్ తివారీ దర్శకత్వంలో భారీ స్థాయి పౌరాణిక చిత్రం రూపొందుతోంది. ఇందులో రణ్‌బీర్ కపూర్ శ్రీరాముడిగా, సాయి పల్లవి సీతగా, యశ్ రావణుడిగా, సన్నీ డియోల్ హనుమంతుడిగా కనిపించనున్నారు. ప్రముఖ సంగీత దర్శకులు ఏఆర్ రెహమాన్, హాన్స్ జిమ్మర్ ఈ చిత్రానికి సంగీతం అందిస్తున్నారు. భారతీయ ఇతిహాసాన్ని అంతర్జాతీయ స్థాయిలో ప్రేక్షకుల ముందుకు తీసుకెళ్లాలనే లక్ష్యంతో చిత్ర బృందం ఈ ప్రాజెక్ట్‌ను ప్రతిష్టాత్మకంగా రూపొందిస్తోంది.

తాజా సమాచారం ప్రకారం, ‘రామాయణం’ చిత్రాన్ని ప్రపంచవ్యాప్తంగా సుమారు 40 భాషల్లో విడుదల చేసేందుకు మేకర్స్ ప్రణాళికలు సిద్ధం చేస్తున్నట్లు తెలుస్తోంది. అంతర్జాతీయ విడుదల కోసం సోనీ పిక్చర్స్‌తో కలిసి పనిచేసే అవకాశాలపై కూడా చర్చలు జరుగుతున్నట్లు సమాచారం. మొదటి భాగాన్ని నవంబర్ 5న, రెండో భాగాన్ని 2027 దీపావళికి విడుదల చేయాలని ప్రణాళిక రూపొందించారు. చిత్రాన్ని ఏయే భాషల్లో విడుదల చేయనున్నారనే పూర్తి వివరాలను చిత్ర బృందం అధికారికంగా వెల్లడించాల్సి ఉంది. భారీ నిర్మాణ విలువలు, ప్రముఖ నటీనటులు, అంతర్జాతీయ విడుదల లక్ష్యంతో ఈ చిత్రం సినీ ప్రేక్షకుల్లో ఆసక్తిని పెంచుతోంది.