‘రామాయణ’ కొత్త ప్రోమోపై విమర్శలు..

భారతీయ సినిమా నుంచి అత్యంత ప్రతిష్ఠాత్మకంగా తెరకెక్కుతున్న భారీ చిత్రాల్లో ‘రామాయణ’ ఒకటి. రణబీర్ కపూర్ ప్రధాన పాత్రలో, సాయి పల్లవి కథానాయికగా నటిస్తున్న ఈ చిత్రానికి నితీష్ తివారి దర్శకత్వం వహిస్తున్నారు. ఇతిహాస కథను భారీ స్థాయిలో తెరకెక్కిస్తూ, విజువల్ ఎఫెక్ట్స్ కోసం హాలీవుడ్‌కు చెందిన DNEG సంస్థతో పనిచేస్తున్నారు. ఇప్పటివరకు విడుదలైన కొన్ని విజువల్స్ ప్రేక్షకులను ఆకట్టుకున్నప్పటికీ, మరికొన్ని సన్నివేశాల నాణ్యతపై విమర్శలు వ్యక్తమవుతున్నాయి.

తాజాగా విడుదల చేసిన ప్రోమో ఈ చర్చకు మరింత ఆజ్యం పోసింది. ఇందులో రణబీర్ కపూర్ ఓ రాక్షసుడితో యుద్ధం చేసే సన్నివేశాలను చూపించారు. అయితే ఈ సన్నివేశాల్లోని గ్రాఫిక్స్ ఆశించిన స్థాయిలో లేవంటూ కొందరు నెటిజన్లు అభిప్రాయపడుతున్నారు. ఇంత భారీ బడ్జెట్‌తో రూపొందుతున్న చిత్రానికి విజువల్ ఎఫెక్ట్స్ మరింత మెరుగ్గా ఉండాలని కామెంట్స్ చేస్తున్నారు. అయితే ఇవి ప్రోమో చూసిన ప్రేక్షకుల అభిప్రాయాలు మాత్రమే. ఈ రోజు విడుదల కానున్నట్లు చెబుతున్న ట్రైలర్‌లో విజువల్స్ ఎలా ఉంటాయి, ప్రేక్షకుల అంచనాలను అందుకుంటాయా అనే ఆసక్తి నెలకొంది.