‘రణబలి’ రిలీజ్ చేంజ్?

యువ హీరో విజయ్ దేవరకొండ నటిస్తున్న భారీ పీరియాడిక్ యాక్షన్ చిత్రం ‘రణబలి’ విడుదల తేదీపై తాజాగా కొత్త ఊహాగానాలు వినిపిస్తున్నాయి. దర్శకుడు రాహుల్ సంకృత్యాన్ తెరకెక్కిస్తున్న ఈ చిత్రాన్ని సెప్టెంబర్ 11న విడుదల చేయనున్నట్లు గతంలో ప్రకటించారు. అయితే ప్రస్తుతం సినీ వర్గాల్లో వినిపిస్తున్న సమాచారం ప్రకారం ఆ తేదీలో మార్పు ఉండే అవకాశం ఉందని ప్రచారం జరుగుతోంది. నిర్మాణ పనులు తుది దశకు చేరుకున్నప్పటికీ, కొన్ని కీలక కార్యక్రమాల సమన్వయం కోసం విడుదలను కొంతకాలం వాయిదా వేయాలని నిర్మాతలు పరిశీలిస్తున్నట్లు తెలుస్తోంది.

ఈ నేపథ్యంలో అక్టోబర్ నెలను కొత్త విడుదల సమయంగా పరిశీలిస్తున్నారనే వార్తలు చక్కర్లు కొడుతున్నాయి. అయితే దీనిపై చిత్రబృందం నుంచి ఎలాంటి అధికారిక ప్రకటన వెలువడలేదు. రష్మిక మందన్నతో కలిసి విజయ్ దేవరకొండ మరోసారి తెరపై కనిపించబోతుండటంతో ప్రేక్షకుల్లో ఆసక్తి మరింత పెరిగింది. చారిత్రక నేపథ్యంతో రూపొందుతున్న ఈ చిత్రానికి సంగీత ద్వయం అజయ్–అతుల్ స్వరాలు సమకూరుస్తుండగా, మైత్రి మూవీ మేకర్స్ ప్రతిష్ఠాత్మకంగా నిర్మిస్తోంది. విడుదల తేదీపై స్పష్టత కోసం అభిమానులు ఆసక్తిగా ఎదురుచూస్తున్నారు.