నిర్మాతల లాభాలపై ఎస్‌కేఎన్ ఆసక్తికర వ్యాఖ్యలు

టాలీవుడ్ యువ నటుడు కిరణ్ అబ్బవరం తాజాగా ‘చెన్నై లవ్ స్టోరీ’ చిత్రంలో హీరోగా నటించారు. శ్రీ గౌరీ ప్రియ కథానాయికగా నటిస్తున్న ఈ సినిమాకు రవి నంబూరి దర్శకత్వం వహిస్తున్నారు. సాయి రాజేష్, ఎస్‌కేఎన్ సంయుక్తంగా నిర్మించిన ఈ చిత్రం జూలై 24న ప్రేక్షకుల ముందుకు రానుంది. విడుదలకు ముందు చిత్రబృందం నిర్వహించిన మీడియా సమావేశంలో కిరణ్ అబ్బవరంను తన గత చిత్రం ‘క’ విజయంపై ప్రశ్నించారు.

‘క’ సినిమా మంచి విజయం సాధించినప్పటికీ నిర్మాతలకు పెద్దగా లాభాలు రాలేదనే వ్యాఖ్యలపై కిరణ్ స్పందిస్తూ, ఇది చిన్న సినిమా అని, భారీ స్థాయి వసూళ్లు సాధించకపోయినా మంచి విజయాన్ని అందుకుందని తెలిపారు. విడుదలకు ముందే సినిమాను డిస్ట్రిబ్యూటర్లకు అమ్మినట్లు చెప్పారు. మరోవైపు నిర్మాత ఎస్‌కేఎన్ మాట్లాడుతూ సినిమా హిట్ అయినంత మాత్రాన నిర్మాతలకు భారీ లాభాలు వస్తాయని భావించడం సరైంది కాదని అన్నారు. తాను నిర్మించిన ‘బేబీ’ సినిమా పెద్ద విజయం సాధించినప్పటికీ కొన్ని బకాయిలు ఇంకా రావాల్సి ఉందని తెలిపారు.