‘ధురంధర్‌’కు దీటుగా చిన్న సినిమా..

కేవలం రూ.2 కోట్ల నామమాత్రపు బడ్జెట్‌తో తెరకెక్కిన ‘హనుమాన్ అంశ’ సినిమా బాక్సాఫీస్‌ వద్ద సంచలన విజయాన్ని అందుకుంటున్నట్లు తెలుస్తోంది. తొలి రోజు సుమారు రూ.10 లక్షల వసూళ్లతో ప్రయాణాన్ని ప్రారంభించిన ఈ చిత్రం.. ప్రేక్షకుల నుంచి లభించిన అద్భుతమైన ఆదరణతో రోజురోజుకూ వసూళ్లను పెంచుకుంది. విడుదలైన 29 రోజుల్లోనే ఏకంగా రూ.120 కోట్ల గ్రాస్‌ సాధించినట్లు సమాచారం. ప్రస్తుతం ఈ సినిమా రూ.200 కోట్ల మార్క్‌ వైపు దూసుకెళ్తోంది.

భారీ బడ్జెట్‌ చిత్రాలకు దీటుగా వసూళ్లు సాధిస్తూ ‘ధురంధర్‌’ వంటి పెద్ద సినిమాలతో పోటీ పడుతున్న చిన్న సినిమాగా ‘హనుమాన్ అంశ’పై ఆసక్తి పెరుగుతోంది. అత్యల్ప పెట్టుబడితో ఇంత భారీ స్థాయిలో వసూళ్లు రాబట్టడం ట్రేడ్‌ వర్గాలను సైతం ఆశ్చర్యపరిచింది. తక్కువ బడ్జెట్‌తో రూపొందిన భారతీయ చిత్రాల్లో అత్యధిక లాభాలు అందించిన సినిమాల్లో ఒకటిగా ఈ చిత్రం నిలుస్తున్నట్లు చర్చ జరుగుతోంది.