హీరో నానిపై హీరోయిన్ నివేదా ప్రశంసలు

'నిన్ను కోరి', '35 చిన్న కథ కాదు' వంటి చిత్రాలతో నటిగా ప్రత్యేక గుర్తింపు తెచ్చుకున్న నివేదా థామస్ తాజాగా హీరో నాని గురించి ఆసక్తికర వ్యాఖ్యలు చేశారు. కొత్త భాషలో సినిమా చేస్తున్నప్పుడు సాధారణంగా ఒంటరితనం అనిపిస్తుందని, కానీ టాలీవుడ్‌లో అడుగుపెట్టినప్పుడు అలాంటి అనుభూతి తనకు ఎప్పుడూ కలగలేదని చెప్పారు. అందుకు ప్రధాన కారణం నాని అందించిన ఆత్మీయత, ప్రోత్సాహమేనని ఆమె పేర్కొన్నారు.

ఎలాంటి అవసరం వచ్చినా ముందుగా నానితోనే పంచుకునేదాన్నని, తన ఇంటి తలుపులు ఎప్పుడూ తన కోసం తెరిచే ఉంచేవారని నివేదా చెప్పారు. అంతటి స్నేహపూర్వక స్వభావం చాలా అరుదుగా కనిపిస్తుందని ఆమె ప్రశంసించారు. 'జెంటిల్‌మ్యాన్'తో మొదలైన వీరి కాంబినేషన్, 'నిన్ను కోరి', 'V' చిత్రాలతో ప్రేక్షకుల్లో మరింత ఆదరణను సంపాదించుకుంది.