‘గరివిడి లక్ష్మి’లో నటించే అవకాశం మిస్ చేసుకున్న హీరోయిన్లు వీరే...

కొన్ని సినిమా కథలు ముందుగా ఒక నటుడిని లేదా నటిని దృష్టిలో పెట్టుకుని సిద్ధం చేసినప్పటికీ, అనుకోని కారణాలతో నటీనటుల ఎంపికలో మార్పులు చోటుచేసుకుంటాయి. ఉత్తరాంధ్రకు చెందిన ప్రముఖ బుర్రకథ కళాకారిణి రెడ్డి విజయలక్ష్మి, అలియాస్ గరివిడి లక్ష్మి జీవిత కథ ఆధారంగా తెరకెక్కిన బయోపిక్ ‘గరివిడి లక్ష్మి’ కూడా అలాంటి చిత్రమే. ఈ సినిమా సక్సెస్ మీట్‌లో దర్శకుడు గౌరి నాయుడు జమ్ము మాట్లాడుతూ, తొలుత ఈ కథను సాయి పల్లవికి వినిపించినట్లు వెల్లడించారు. ఆ తర్వాత నివేదా థామస్, నిత్యా మీనన్‌లను కూడా సంప్రదించినట్లు తెలిపారు. అయితే కొన్ని నిబంధనలు, షరతుల కారణంగా వారు ఈ పాత్రను అంగీకరించలేకపోయారని దర్శకుడు వివరించారు.

చివరకు ఈ పాత్రను ఆనంది పోషించగా, ఆమె నటనకు ప్రేక్షకుల నుంచి ప్రశంసలు లభించాయి. ఈ సినిమాకు బలమైన మద్దతు అందించిన పీపుల్ మీడియా ఫ్యాక్టరీకి చెందిన విశ్వ ప్రసాద్‌కు దర్శకుడు కృతజ్ఞతలు తెలిపారు. సినిమాకు మంచి ప్రశంసలు దక్కినప్పటికీ, బాక్సాఫీస్ వద్ద వసూళ్లు మాత్రం ఆశాజనకంగా లేవు. ఈ చిత్రంలో రాగ్ మయూర్, నరేష్, రాశి, ఎల్‌బీ శ్రీరామ్ తదితరులు కీలక పాత్రల్లో నటించగా, చరణ్ అర్జున్ సంగీతం అందించారు.