‘ఆర్‌ఆర్‌ఆర్‌’ కంటే ‘వారణాసి’ ఐదు నుంచి ఆరు రెట్లు పెద్దది - రాజమౌళి

దర్శకధీరుడు ఎస్.ఎస్. రాజమౌళి ఇటీవల 50వ సావో పాలో అంతర్జాతీయ చలనచిత్రోత్సవం, మోస్త్రా డి సావో పాలోలో పాల్గొన్నారు. ఈ సందర్భంగా ఆయన తొలిసారిగా బ్రెజిల్‌ను సందర్శించారు. అక్కడ ప్రేక్షకులతో జరిగిన ముఖాముఖి కార్యక్రమంలో తన తదుపరి చిత్రం ‘వారణాసి’ గురించి ఆసక్తికర విషయాలను వెల్లడించారు. మహేశ్ బాబు ప్రధాన పాత్రలో నటిస్తున్న ఈ చిత్రం, తన బ్లాక్‌బస్టర్ మూవీ ‘ఆర్‌ఆర్‌ఆర్‌’ కంటే ఐదు నుంచి ఆరు రెట్లు భారీ స్థాయిలో ఉంటుందని రాజమౌళి తెలిపారు. ఈ సినిమా చిత్రీకరణ గురించి మాట్లాడుతూ, ముందస్తు ప్రణాళికతో పని చేయడం వల్ల షూటింగ్‌ను తక్కువ సమయంలో పూర్తి చేయగలిగామని చెప్పారు. ‘ఆర్‌ఆర్‌ఆర్‌’ చిత్రీకరణకు 315 రోజులు పట్టగా, మరింత భారీ స్థాయిలో రూపొందుతున్న ‘వారణాసి’ని 275 రోజుల్లోనే పూర్తి చేశామని, తద్వారా 40 రోజులు ఆదా చేశామని వెల్లడించారు.

‘వారణాసి’ని ప్రపంచవ్యాప్తంగా భారీ స్థాయిలో థియేటర్లలో విడుదల చేయాలని ప్రణాళికలు సిద్ధం చేస్తున్నట్లు రాజమౌళి తెలిపారు. ‘ఆర్‌ఆర్‌ఆర్‌’ బ్రెజిల్‌లో నేరుగా ఓటీటీలో విడుదలైనప్పటికీ, ‘వారణాసి’ని ప్రపంచవ్యాప్తంగా ప్రేక్షకులు పెద్ద తెరపై ఆస్వాదించాలని ఆయన కోరుకుంటున్నారు. కేఎల్ నారాయణకు చెందిన దుర్గా ఆర్ట్స్ నిర్మిస్తున్న ఈ చిత్రంలో మహేశ్ బాబుతో పాటు పృథ్వీరాజ్ సుకుమారన్, ప్రియాంక చోప్రా కీలక పాత్రల్లో నటిస్తున్నారు. భారీ కథా పరిధి, అంతర్జాతీయ విడుదల ప్రణాళికలతో ఈ సినిమాపై అంచనాలు పెరుగుతున్నాయి. సినిమా విడుదల, ప్రచారానికి సంబంధించిన మరిన్ని వివరాలపై ప్రేక్షకుల్లో ఆసక్తి నెలకొంది.