భూమి పూజతో ప్రారంభమైన వరుణ్ తేజ్ ‘బరి’..

మెగా ప్రిన్స్ వరుణ్ తేజ్ హీరోగా తెరకెక్కనున్న కొత్త చిత్రం ‘బరి’కి సంబంధించి దసరా సందర్భంగా చిత్ర బృందం ప్రత్యేక అప్‌డేట్‌ను విడుదల చేసింది. విజయదశమి పర్వదినాన్ని పురస్కరించుకుని సినిమా ప్రారంభోత్సవంగా భూమి పూజ కార్యక్రమాన్ని నిర్వహించారు. పింక్ ఎలిఫెంట్ పిక్చర్స్ బ్యానర్‌పై నిహారిక కొణిదెల ఈ చిత్రాన్ని నిర్మిస్తుండగా, కమిటీ కుర్రోళ్లు సినిమాతో జాతీయ స్థాయిలో గుర్తింపు పొందిన యదు వంశీ దర్శకత్వం వహిస్తున్నారు. పూజా కార్యక్రమాల దృశ్యాలతో కూడిన టైటిల్ పోస్టర్‌ను విడుదల చేస్తూ చిత్ర బృందం ప్రేక్షకులకు దసరా శుభాకాంక్షలు తెలిపింది. పోస్టర్‌లో కనిపిస్తున్న గ్రామీణ వాతావరణం, సినిమా సెట్స్ నిర్మాణానికి సంబంధించిన దృశ్యాలు ఆసక్తిని రేకెత్తిస్తున్నాయి.

టైటిల్ డిజైన్‌తో పాటు పోస్టర్‌లో కనిపిస్తున్న వాలీబాల్ ఆటకు సంబంధించిన విజువల్స్‌ను బట్టి ఈ చిత్రం క్రీడా నేపథ్యంతో కూడిన యాక్షన్ డ్రామాగా తెరకెక్కనున్నట్లు తెలుస్తోంది. త్వరలోనే రెగ్యులర్ షూటింగ్ ప్రారంభం కానుంది. పాన్ ఇండియా స్థాయిలో రూపొందుతున్న ‘బరి’ చిత్రాన్ని తెలుగు, హిందీ, కన్నడ, తమిళం, మలయాళ భాషల్లో విడుదల చేయనున్నారు. వరుణ్ తేజ్ కథానాయకుడిగా, నిహారిక కొణిదెల నిర్మాతగా, యదు వంశీ దర్శకుడిగా ఈ ప్రాజెక్ట్‌పై ప్రేక్షకుల్లో ఆసక్తి నెలకొంది.