వెంకటేశ్‌ ‘ఆదర్శ కుటుంబం’ విడుదల తేదీ ఖరారు

విక్టరీ వెంకటేశ్‌ హీరోగా మాటల మాంత్రికుడు త్రివిక్రమ్‌ శ్రీనివాస్‌ దర్శకత్వంలో తెరకెక్కుతున్న చిత్రం ‘ఆదర్శ కుటుంబం’ విడుదల తేదీ ఖరారైంది. పలుమార్లు వాయిదా పడిన ఈ సినిమాను అక్టోబర్‌ 30న థియేటర్లలో విడుదల చేయనున్నట్లు చిత్రబృందం అధికారికంగా ప్రకటించింది. దసరా సందర్భంగా వెంకటేశ్‌ విడుదల తేదీని వెల్లడిస్తూ పోస్టర్‌ను పంచుకున్నారు. దాదాపు రెండు దశాబ్దాల తర్వాత త్రివిక్రమ్‌తో కలిసి పనిచేయడం ఆనందంగా ఉందని, వినోదం, యాక్షన్‌తో ప్రేక్షకులను అలరించేందుకు అక్టోబర్‌ 30న వస్తున్నామని తెలిపారు.

మొదట ఈ చిత్రాన్ని అక్టోబర్‌ 2న విడుదల చేయాలని భావించినప్పటికీ, పోస్ట్‌ ప్రొడక్షన్‌ పనులు పూర్తికాకపోవడంతో అక్టోబర్‌ 9కి వాయిదా వేశారు. ఆ తేదీకి కూడా విడుదల సాధ్యం కాకపోవడంతో చిత్రబృందం మరోసారి వాయిదా వేసింది. తాజాగా అక్టోబర్‌ 30న విడుదల చేయనున్నట్లు స్పష్టం చేసింది. కుటుంబ భావోద్వేగాలకు యాక్షన్‌, వినోదాన్ని జోడించి ఈ చిత్రాన్ని రూపొందిస్తున్నారు. ఇందులో వెంకటేశ్‌ మధ్యతరగతి వ్యక్తిగా కనిపించనున్నారు. గతంలో ‘నువ్వు నాకు నచ్చావ్‌’, ‘మల్లీశ్వరి’ చిత్రాలకు త్రివిక్రమ్‌ రచన అందించగా, ఇప్పుడు వీరిద్దరూ కలిసి పనిచేస్తుండటంతో సినిమాపై ప్రేక్షకుల్లో ఆసక్తి నెలకొంది.