నేడు విడుదల కానున్న వెంకటేష్ ‘మాలా’ పాట

వెంకటేష్ కథానాయకుడిగా నటిస్తున్న కుటుంబ కథాచిత్రం ‘ఆదర్శ కుటుంబం’ అక్టోబర్‌ 30, 2026న విడుదలయ్యే అవకాశాలున్నట్లు సమాచారం. అయితే దీనిపై చిత్రబృందం నుంచి అధికారిక ప్రకటన రావాల్సి ఉంది. ఈలోగా సినిమా నుంచి రెండో పాట ‘మాలా’ను విడుదల చేసేందుకు మేకర్స్‌ సిద్ధమయ్యారు. తమన్‌ స్వరపరిచిన ఈ ఉత్సాహభరిత గీతంలో వెంకటేష్, నివేదా పేతురాజ్‌ కనిపించనున్నారు. ఈ పాటను నేడు సాయంత్రం 6:03 గంటలకు విడుదల చేయనున్నట్లు ప్రకటించారు.

అయితే పాటకు సంబంధించిన ప్రచార పోస్టర్‌లో సినిమా విడుదల తేదీని ప్రస్తావించలేదు. పాటతో పాటు చిత్ర విడుదల తేదీని కూడా ప్రకటించే అవకాశం ఉందని అభిమానులు భావిస్తున్నారు. త్రివిక్రమ్‌ దర్శకత్వం వహిస్తున్న ఈ చిత్రంలో శ్రీనిధి శెట్టి కథానాయికగా నటిస్తున్నారు. హారిక అండ్‌ హాసిని క్రియేషన్స్‌ సంస్థ నిర్మిస్తున్న ఈ సినిమాలో నారా రోహిత్‌, పూజిత పొన్నాడ, రావు రమేశ్‌, సత్య తదితరులు కీలక పాత్రలు పోషిస్తున్నారు.