కల్కి 2898 ఏడి మేకర్స్ స్ట్రాంగ్ వార్నింగ్...

ప్రముఖ నిర్మాణ సంస్థ వైజయంతి మూవీస్ కీలక ప్రకటన చేసింది. తమ ప్రతిష్టాత్మక చిత్రం కల్కి 2898 ఏడి పేరుతో నకిలీ నటీనటుల ఎంపిక ప్రకటనలు, సంప్రదింపులు జరుగుతున్నాయని పేర్కొంటూ ప్రేక్షకులు, కొత్తగా నటించాలని ప్రయత్నిస్తున్న వారిని అప్రమత్తం చేసింది. తమ సంస్థ తరఫున నటీనటుల ఎంపిక లేదా ఆడిషన్లు నిర్వహించేందుకు ఎలాంటి మూడో పక్ష సంస్థకు, ఏజెన్సీకి లేదా వ్యక్తికి అనుమతి ఇవ్వలేదని స్పష్టం చేసింది. వైజయంతి మూవీస్ ప్రతినిధులమంటూ ఎవరైనా సంప్రదిస్తే స్పందించవద్దని సూచించింది.

ముఖ్యంగా వ్యక్తిగత వివరాలు, ఆడిషన్‌కు సంబంధించిన చిత్రాలు లేదా ఇతర సమాచారం అపరిచితులకు పంపొద్దని హెచ్చరించింది. ఎలాంటి చెల్లింపులు చేయవద్దని కూడా స్పష్టం చేసింది. సంస్థ పేరును ఉపయోగించి మోసాలకు పాల్పడేవారిపై చట్టపరమైన చర్యలు తీసుకుంటామని తెలిపింది. సినిమా లేదా నటీనటుల ఎంపికకు సంబంధించిన నిజమైన సమాచారం కోసం వైజయంతి మూవీస్ అధికారిక సామాజిక మాధ్యమ ఖాతాలను మాత్రమే అనుసరించాలని కోరింది. అభిమానులు జాగ్రత్తగా ఉండాలని సూచించింది.