సముద్ర గుహల్లో ప్రాణాల పోరాటం.. ఉత్కంఠ రేపుతున్న ‘ది డెవిల్స్ మౌత్’!

సర్వైవల్ థ్రిల్లర్ చిత్రాలకు ప్రపంచవ్యాప్తంగా ప్రత్యేకమైన ఆదరణ ఉంది. ప్రమాదకర పరిస్థితుల్లో మనుగడ కోసం జరిగే పోరాటం, ఊహించని మలుపులు, భయానక సంఘటనలు ప్రేక్షకులను కథలో పూర్తిగా ముంచెత్తుతాయి. ఇప్పుడు అలాంటి అంశాలతో రూపొందిన హాలీవుడ్ చిత్రం ‘ది డెవిల్స్ మౌత్’ నేరుగా ఓటీటీలోకి రానుంది. ఇప్పటికే విడుదలైన ప్రచార చిత్రాలు ఈ సినిమాపై ఆసక్తిని మరింత పెంచాయి.

ప్రైమ్ వీడియో వేదికగా జూలై 29 నుంచి ఈ చిత్రం స్ట్రీమింగ్‌కు అందుబాటులోకి రానుంది. కేథరిన్ న్యూటన్ ప్రధాన పాత్రలో నటించిన ఈ సినిమాలో లానా కాండర్, గావిన్ కాసలెగ్నో, నికో హిరాగా తదితరులు కీలక పాత్రల్లో కనిపించనున్నారు. థాయిలాండ్ సముద్ర గర్భంలోని ప్రమాదకర గుహల్లో సాహసం కోసం వెళ్లిన కొందరు స్నేహితులు అక్కడ చిక్కుకుపోతారు. బయటపడే మార్గాలు మూసుకుపోయిన సమయంలో, వారి ప్రాణాలపై కన్నేసిన ఓ భయంకర సముద్ర జీవితో వారు చేసే పోరాటమే కథకు ప్రధానాంశం. హారర్, అడ్వెంచర్, సర్వైవల్ అంశాల కలయికగా ఈ చిత్రం థ్రిల్లర్ అభిమానులను ఆకట్టుకునేలా కనిపిస్తోంది.