సింపుల్‌ లైఫ్‌ వ్యాఖ్యలపై డీకే శివకుమార్‌కు బీజేపీ సెటైర్లు

కర్ణాటక ఉప ముఖ్యమంత్రి డీకే శివకుమార్‌ ఇండియా టుడే రౌండ్‌టేబుల్‌ కార్యక్రమంలో తన సరళమైన జీవనశైలిని వివరించారు. ఢిల్లీలో హెయిర్‌కట్‌కు తాను కేవలం రూ.50 మాత్రమే ఖర్చు చేస్తానని, ఇంటికి బార్బర్‌ను పిలిపించుకోవడం కంటే సాధారణ బార్బర్‌ షాపుకే వెళ్లడం ఇష్టమని తెలిపారు. తనకు ఆడంబరాల కంటే సాధారణ జీవనం ఇష్టమనే విషయాన్ని చెప్పేందుకు ఈ ఉదాహరణ ఇచ్చారు.

అయితే ఈ వ్యాఖ్యలు రాజకీయ వివాదానికి దారితీశాయి. శివకుమార్‌ ఎన్నికల అఫిడవిట్‌లో రూ.1,400 కోట్లకు పైగా వ్యక్తిగత ఆస్తులు ప్రకటించిన విషయాన్ని ప్రస్తావిస్తూ రాజకీయ ప్రత్యర్థులు ఆయనపై విమర్శలు గుప్పించారు. బీజేపీ సోషల్‌ మీడియాలో ఆయన వ్యాఖ్యలను ఎద్దేవా చేస్తూ, ఖరీదైన రోలెక్స్‌ వాచ్‌, లూయి విట్టన్‌ స్కార్ఫ్‌ వంటి విలాస వస్తువులు ధరించిన ఫొటోలను షేర్‌ చేసింది. ఆయన చెప్పే సరళతకు, ప్రకటించిన సంపదకు మధ్య వైరుధ్యం ఉందంటూ బీజేపీ విమర్శలు చేసింది.