చంద్రబాబు కీలక ఆదేశాలు.. రెబల్ అభ్యర్థులు నామినేషన్లు ఉపసంహరించుకోవాలి

స్థానిక సంస్థల ఎన్నికల్లో కూటమి అభ్యర్థుల విజయానికి సమష్టిగా కృషి చేయాలని టీడీపీ అధినేత, ముఖ్యమంత్రి చంద్రబాబు నాయుడు పార్టీ ఎంపీలు, మంత్రులు, ఎమ్మెల్యేలు, ముఖ్య నేతలకు సూచించారు. పార్టీ తరఫున అధికారికంగా ఎంపిక చేసిన అభ్యర్థులకు బీ-ఫారాలు త్వరగా అందించాలని, రెబల్‌గా నామినేషన్లు వేసిన వారితో వాటిని ఉపసంహరించుకునేలా చర్చించాలని ఆదేశించారు. పార్టీ నిర్ణయాలను ధిక్కరించి స్వతంత్రంగా పోటీ చేస్తే క్రమశిక్షణ చర్యలు తప్పవని హెచ్చరించారు. మూడు కూటమి పార్టీలు సమన్వయంతో పనిచేస్తూ, సీట్ల కేటాయింపులో పరస్పర అవగాహనతో ముందుకు సాగాలని స్పష్టం చేశారు.

కార్పొరేషన్లు, మున్సిపాలిటీలు, జడ్పీటీసీ, ఎంపీటీసీ, సర్పంచ్ ఎన్నికల్లో సమర్థులైన అభ్యర్థులను ఎంపిక చేసి గెలిపించాలని చంద్రబాబు సూచించారు. ఇంటింటి ప్రచారం నిర్వహిస్తూ ప్రభుత్వం చేపట్టిన అభివృద్ధి, సంక్షేమ కార్యక్రమాలను ప్రజలకు వివరించాలని చెప్పారు. గత సార్వత్రిక ఎన్నికల్లో సాధించిన 57 శాతం స్ట్రైక్ రేట్ కంటే స్థానిక ఎన్నికల్లో మెరుగైన ఫలితాలు సాధించాలని లక్ష్యంగా నిర్దేశించారు. 11 కార్పొరేషన్లను 11 సామాజికవర్గాలకు కేటాయించడం ద్వారా అన్ని వర్గాలకు రాజకీయ ప్రాతినిధ్యం కల్పించాలన్నదే ఉద్దేశమని తెలిపారు. పార్టీ కోసం పనిచేసిన వారికి స్థానిక ఎన్నికల్లో అవకాశం కల్పించాలని, పొత్తులు లేదా ఇతర సమీకరణాల కారణంగా సీట్లు దక్కని వారికి నామినేటెడ్ పదవుల్లో అవకాశం కల్పిస్తామని హామీ ఇచ్చారు.