సీఈసీ జ్ఞానేశ్ కుమార్ రాజీనామాకు కాంగ్రెస్ డిమాండ్.. ఢిల్లీలో భారీ సభ

ప్రధాన ఎన్నికల కమిషనర్ (CEC) జ్ఞానేశ్ కుమార్ రాజీనామా చేయాలని డిమాండ్ చేస్తూ, కాంగ్రెస్ పార్టీ ఆధ్వర్యంలో నవంబర్ 1న ఢిల్లీలో భారీ సభ నిర్వహించేందుకు ఏర్పాట్లు జరుగుతున్నాయి. ఈ నేపథ్యంలో హైదరాబాద్‌లో నిర్వహించాల్సిన సభను రద్దు చేసినట్లు సమాచారం. ఢిల్లీలో జరిగే సభను ప్రతిష్ఠాత్మకంగా నిర్వహించాలని కాంగ్రెస్ అధిష్ఠానం నిర్ణయించినట్లు తెలుస్తోంది.

ఈ సభకు తెలంగాణ నుంచి పెద్ద సంఖ్యలో నాయకులు, ప్రజాప్రతినిధులు హాజరయ్యేలా చూడాలని ముఖ్యమంత్రి రేవంత్ రెడ్డి, పీసీసీ అధ్యక్షుడు మహేశ్ గౌడ్‌కు పార్టీ అధిష్ఠానం ఆదేశించినట్లు సమాచారం. రాష్ట్రంలోని అధికార పార్టీకి చెందిన సర్పంచ్‌ల నుంచి మంత్రుల వరకు అందరూ ఢిల్లీకి తరలివెళ్లేలా ఏర్పాట్లు చేస్తున్నారు. తెలంగాణ నేతలను ప్రత్యేక రైళ్లలో ఢిల్లీకి తీసుకెళ్లేందుకు ఇప్పటికే బుకింగ్‌లు చేసినట్లు తెలుస్తోంది. ఇందుకు సంబంధించిన ఏర్పాట్లను మహేశ్ గౌడ్ పర్యవేక్షిస్తున్నట్లు సమాచారం.