కాంగ్రెస్ ఎమ్మెల్యే రాజగోపాల్ రెడ్డి సంచలన వ్యాఖ్యలు...

వైఎస్సార్‌సీపీ ఎన్‌ఆర్‌ఐ టీమ్‌ ఏర్పాటు చేసిన ట్విట్టర్‌ స్పేస్‌లో మునుగోడు కాంగ్రెస్‌ ఎమ్మెల్యే కోమటిరెడ్డి రాజగోపాల్‌రెడ్డి సంచలన వ్యాఖ్యలు చేశారు. తాను మార్పు దిశగా అడుగులు వేస్తున్నానని, అందుకే గత కొన్ని నెలలుగా పలు అంశాలపై స్పందిస్తూ ప్రభుత్వ నిర్ణయాలను ఖండిస్తున్నానని అన్నారు. వైఎస్‌ రాజశేఖర్‌రెడ్డి పంథాలోనే తాను రాజకీయ ప్రయాణం కొనసాగిస్తానని పేర్కొన్నారు. ఫీజు రీయింబర్స్‌మెంట్‌ బకాయిలను చెల్లించలేని పరిస్థితిలో ప్రభుత్వం ఉందని విమర్శించారు. ప్రజలకు నష్టం కలిగించేలా ప్రభుత్వం కొన్ని నిర్ణయాలు తీసుకుందని ఆరోపించారు. అవినీతిని అరికట్టేందుకు ప్రభుత్వం కఠిన చర్యలు తీసుకోవాలని డిమాండ్‌ చేశారు.

అవినీతి గ్రామీణ ప్రాంతాల వరకు విస్తరించిందని రాజగోపాల్‌రెడ్డి వ్యాఖ్యానించారు. రాజకీయాల్లోకి కేవలం డబ్బు సంపాదించేందుకు వచ్చిన వారు శాశ్వతంగా కొనసాగలేరని అన్నారు. రైతు బంధు వంటి సంక్షేమ పథకాలు అమలు చేస్తూనే బెల్ట్‌ షాపుల ద్వారా ప్రజల నుంచి డబ్బులు వసూలు చేస్తున్నారని ఆరోపించారు. తనకు ప్రత్యేక రాజకీయ కార్యాచరణ ఉంటుందని, తెలంగాణలో మార్పు తీసుకొచ్చే దిశగా ముందుకు సాగుతానని తెలిపారు. త్వరలో సంచలన నిర్ణయం తీసుకుంటానంటూ రాజగోపాల్‌రెడ్డి చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి. అయితే పార్టీ మార్పుపై ఆయన ఎలాంటి అధికారిక ప్రకటన చేయలేదు.