కేసీఆర్ రాజీనామాకు కాంగ్రెస్ మహా ధర్నా

కేసీఆర్ ఎమ్మెల్యే పదవికి రాజీనామా చేయాలని డిమాండ్ చేస్తూ తెలంగాణ కాంగ్రెస్ మహా ధర్నాకు పిలుపునిచ్చింది. ఈ నెల 6వ తేదీ ఆదివారం హైదరాబాద్‌లోని ఇందిరాపార్క్ ధర్నా చౌక్ వద్ద ఈ మహా ధర్నా నిర్వహించనుంది. సుమారు వెయ్యి రోజులుగా జీతం తీసుకుంటూ ప్రతిపక్ష పాత్రను సమర్థంగా నిర్వహించకుండా, అసెంబ్లీకి హాజరుకావడం లేదని కాంగ్రెస్ ఆరోపించింది. మాజీ సీఎం కేసీఆర్ తన ఎమ్మెల్యే పదవికి రాజీనామా చేయాలని పార్టీ డిమాండ్ చేసింది. ఈ ధర్నాలో కాంగ్రెస్ ముఖ్య నేతలు, ఎమ్మెల్యేలు, ఎమ్మెల్సీలు, ఇతర ప్రజాప్రతినిధులు పాల్గొననున్నారు.

మహా ధర్నా ఏర్పాట్లపై రేపు ఉదయం 9 గంటలకు సన్నాహక సమావేశం నిర్వహించనున్నారు. హైదరాబాద్, రంగారెడ్డి జిల్లాల ఇన్‌చార్జి మంత్రులు పొన్నం ప్రభాకర్, శ్రీధర్‌బాబు ఆధ్వర్యంలో ఈ సమావేశం జరగనుంది. రెండు జిల్లాల డీసీసీ అధ్యక్షులు, ఎమ్మెల్యేలు, నియోజకవర్గ ఇన్‌చార్జులు, ఇతర ముఖ్య నేతలు హాజరుకానున్నారు. ఆదివారం జరిగే మహా ధర్నాను విజయవంతం చేసేందుకు అవసరమైన కార్యాచరణ, ఏర్పాట్లపై సమావేశంలో చర్చించనున్నారు.