ఇరాన్‌తో డీల్ కుదిరితే.. ఇస్లామాబాద్ వెళ్తా: ట్రంప్‌

అమెరికా అధ్యక్షుడు డోనాల్డ్ ట్రంప్ ఇరాన్‌తో తుది ఒప్పందం కుదిరితే ఇస్లామాబాద్‌కు వెళ్లే అవకాశముందని తెలిపారు. నెవాడా, అరిజోనా రాష్ట్రాల పర్యటనకు వెళ్లే ముందు వైట్ హౌస్ వద్ద మీడియాతో మాట్లాడుతూ ఆయన ఈ విషయాన్ని వెల్లడించారు. ఇరాన్‌తో చాలా అంశాలపై ఇప్పటికే అంగీకారం కుదిరిందని, శుద్ధి చేసిన యురేనియంను అప్పగించేందుకు కూడా ఇరాన్ ఒప్పుకున్నట్లు తెలిపారు.

పాకిస్థాన్ ఆధ్వర్యంలో జరుగుతున్న దౌత్య చర్చలు త్వరలోనే సానుకూల ఫలితానికి చేరుకుంటాయని ట్రంప్ ఆశాభావం వ్యక్తం చేశారు. ప్రస్తుతం ఉన్న కాల్పుల విరమణ ముగిసేలోపు ఈ ఒప్పందం కుదిరే అవకాశాలు ఉన్నాయని చెప్పారు. ఒకవేళ ఈ ఒప్పందంపై ఇస్లామాబాద్‌లో సంతకాలు జరగాల్సి వస్తే, తాను అక్కడికి వెళ్లేందుకు సిద్ధంగా ఉన్నట్లు తెలిపారు.

ఈ ఒప్పందం పూర్తయితే ప్రస్తుతం కొనసాగుతున్న కాల్పుల విరమణను పొడిగించే అవసరం ఉండకపోవచ్చని ట్రంప్ పేర్కొన్నారు. ఈ పరిణామాలు అంతర్జాతీయ స్థాయిలో ఒక ముఖ్యమైన ఒప్పందం కుదిరే సూచనలుగా కనిపిస్తున్నాయి.