దావూద్‌పై ఐరాస నివేదిక.. భారత్ తీవ్ర అభ్యంతరం!

అండర్‌వరల్డ్‌ డాన్ దావూద్ ఇబ్రహీం నేతృత్వంలోని డీ-కంపెనీని ‘భారత్‌కు చెందిన క్రిమినల్ సంస్థ’గా పేర్కొన్న ఐక్యరాజ్యసమితి ప్రత్యేక ప్రతినిధి నివేదికపై భారత్ తీవ్ర అభ్యంతరం వ్యక్తం చేసింది. ఐరాస జనరల్ అసెంబ్లీలోని మూడో కమిటీ సమావేశంలో భారత శాశ్వత మిషన్ ఫస్ట్ సెక్రటరీ రఘూ పూరి మాట్లాడుతూ, నివేదికలోని ఈ ప్రస్తావన వాస్తవాలను పూర్తిగా ప్రతిబింబించడం లేదని పేర్కొన్నారు. 1993 ముంబయి వరుస పేలుళ్ల కేసులో దావూద్ ఇబ్రహీం భారత్‌లో మోస్ట్ వాంటెడ్‌గా ఉన్న విషయాన్ని నివేదికలో ప్రస్తావించకపోవడంపై ఆయన అసంతృప్తి వ్యక్తం చేశారు.

ఐరాస భద్రతా మండలి 2003 నవంబర్ 3న అల్‌ఖైదాతో సంబంధాల ఆరోపణల నేపథ్యంలో దావూద్ ఇబ్రహీంను అంతర్జాతీయ ఆంక్షల జాబితాలో చేర్చింది. ఐరాస అధికారిక రికార్డుల్లో అతడిని భారత పౌరుడిగా పేర్కొంటూ, పాకిస్థాన్‌లోని కరాచీ చిరునామాలను కూడా నమోదు చేశారు. డీ-కంపెనీ మూలాలు, దాని నాయకుడి ప్రస్తుత స్థానం వంటి అంశాలను వేర్వేరుగా స్పష్టంగా ప్రస్తావించాలని భారత్ అభిప్రాయపడింది. ఐరాస నివేదికల్లో వాస్తవాలకు విరుద్ధమైన వివరాలు చోటుచేసుకుంటే ఆ సంస్థ విశ్వసనీయత దెబ్బతింటుందని భారత ప్రతినిధి పేర్కొన్నట్లు నివేదికలు వెల్లడించాయి.