జూబ్లీహిల్స్ ఉపఎన్నికపై ఏపీ దృష్టి! టీడీపీ ఓట్లు ఎవరికి?

హైదరాబాద్‌ జూబ్లీహిల్స్ అసెంబ్లీ ఉపఎన్నిక ఇప్పుడు కేవలం తెలంగాణకే పరిమితం కాకుండా ఆంధ్రప్రదేశ్ రాజకీయాల్లోనూ హాట్ టాపిక్‌గా మారింది. బీఆర్‌ఎస్‌ ఎమ్మెల్యే మాగంటి గోపీనాథ్‌ మరణంతో ఈ ఎన్నిక జరగనుంది. నవంబర్‌ 11న పోలింగ్‌ జరగగా, మొత్తం 58 మంది అభ్యర్థులు బరిలో ఉన్నారు. ప్రధానంగా కాంగ్రెస్‌, బీఆర్‌ఎస్‌, బీజేపీ పార్టీల మధ్య పోటీ హోరాహోరీగా సాగుతోంది. అయితే, ఈ ఉపఎన్నికలో తెలంగాణ రాజకీయాల కంటే ఏపీ రాజకీయ వాతావరణం ఎక్కువగా చర్చనీయాంశమవుతోంది. కారణం  తెలుగుదేశం పార్టీ (TDP). ఆ పార్టీ ఇక్కడ బరిలో లేకపోయినా, ప్రధాన నేతలు కేటీఆర్ మరియు రేవంత్ రెడ్డి ఇద్దరూ ప్రచారంలో టీడీపీ పేరునే ప్రస్తావించడం ఆసక్తికరంగా మారింది.

కేటీఆర్ మాట్లాడుతూ, “నా పేరు, నా కుటుంబానికి ఎన్టీఆర్ గారి పార్టీ అయిన తెలుగుదేశం పట్ల ఉన్న అభిమానం వేరేలా ఉంటుంది. టీడీపీ కార్యకర్తలు మాకు మద్దతు ఇస్తారని నమ్మకం ఉంది,” అని తెలిపారు. దీనికి ప్రతిగా సీఎం రేవంత్ రెడ్డి మాట్లాడుతూ, “చంద్రబాబు గారి అరెస్టు సమయంలో నిరసన తెలిపే హక్కు ఇవ్వని వారికి ఓటేస్తారా? ఎన్టీఆర్ ఘాట్ తొలగించడానికి ప్రయత్నించిన వారికి మద్దతు ఇస్తారా?” అంటూ టీడీపీ అనుకూల ఓట్లను ఆకర్షించే ప్రయత్నం చేశారు. తెలుగుదేశం, బీజేపీ, జనసేన కూటమి ఏపీలో అధికారంలో ఉన్నా, ఈ ఎన్నికలో జనసేన, టీడీపీ రెండూ పోటీలో లేవు. అయితే, జనసేన పార్టీ బీజేపీకి మద్దతు ప్రకటించింది. జనసేన తెలంగాణ ఇన్‌ఛార్జ్ నేమూరి శంకర్ గౌడ్, బీజేపీ నేతలు కిషన్ రెడ్డి, రామచందర్ రావులను కలసి మద్దతు తెలిపారు.

ఇక టీడీపీ మాత్రం ఎవరికి మద్దతు తెలిపలేదు. జూబ్లీహిల్స్ ప్రాంతంలో టీడీపీ సానుభూతిపరులు గణనీయంగా ఉన్నారు. గత అసెంబ్లీ ఎన్నికల్లో టీడీపీ పోటీ చేయకపోవడంతో, ఆ వర్గం రేవంత్ రెడ్డికి మద్దతు ఇచ్చింది. ఇప్పుడు ఆ మద్దతు కొనసాగుతుందా లేక బీజేపీ వైపు మళ్లుతుందా అనేది కీలకం. రాజకీయ విశ్లేషకుల అభిప్రాయం ప్రకారం, ఈ ఉపఎన్నిక ఫలితం తెలంగాణలోనే కాదు, ఏపీలోనూ టీడీపీ, జనసేన భవిష్యత్తు దిశను నిర్ణయించే సూచనలు ఇవ్వవచ్చు. అందుకే జూబ్లీహిల్స్ ఉపఎన్నికను ఆంధ్రప్రదేశ్‌లోని రాజకీయ వర్గాలు పెద్ద ఆసక్తితో గమనిస్తున్నాయి.