సింగరేణి కార్మిక గర్జన సభలో కాంగ్రెస్‌పై కేటీఆర్‌ విమర్శలు

గోదావరిఖనిలో నిర్వహించిన సింగరేణి కార్మిక గర్జన బహిరంగ సభకు బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ హాజరయ్యారు. ఈ సందర్భంగా ఆయన మాట్లాడుతూ, రామగుండం పోరాటాలకు పురిటిగడ్డ అని, తెలంగాణ ఉద్యమ సమయంలో కేసీఆర్‌ పిలుపుతో కోల్‌బెల్ట్‌ ప్రాంతమంతా కదిలిందని అన్నారు. ఉత్పత్తి, ఉద్యమాల్లో సింగరేణి కార్మికులు ముందుంటారని కొనియాడారు. కాంగ్రెస్‌ పాలనలో రాష్ట్రంలో విద్యుత్‌ సమస్యలు పెరిగాయని విమర్శిస్తూ, కాంగ్రెస్‌ అధికారంలోకి వచ్చిన తర్వాత కరెంట్‌ కష్టాలు మొదలయ్యాయని ఆరోపించారు. విద్యుత్‌ కోసం రైతులు రోడ్లపైకి రావాల్సిన పరిస్థితి ఏర్పడిందని వ్యాఖ్యానించారు.

కాంగ్రెస్‌ పాలనలో సింగరేణి బొగ్గు ఉత్పత్తి తగ్గిందని కేటీఆర్‌ ఆరోపించారు. గతంలో 70 మిలియన్‌ టన్నులుగా ఉన్న ఉత్పత్తి 58 మిలియన్‌ టన్నులకు పడిపోయిందని పేర్కొన్నారు. సింగరేణిని ప్రైవేటీకరించేందుకు ముఖ్యమంత్రి రేవంత్‌ రెడ్డి కుట్ర చేస్తున్నారని ఆరోపించారు. సంస్థలో ముఖ్యమంత్రి బావమరిది పెత్తనం కొనసాగుతోందని, సింగరేణిలో అనేక కుంభకోణాలు జరుగుతున్నాయని విమర్శించారు. కాంగ్రెస్‌ పాలనలో రాష్ట్రం మళ్లీ పాత పరిస్థితులకు చేరుకుందని ఆయన అన్నారు.