నాగబాబుకు కేబినెట్ హోదా.. ఏపీ ప్రభుత్వం కీలక ఉత్తర్వులు

జనసేన నేత, ఎమ్మెల్సీ కొణిదెల నాగేంద్రరావు, ప్రముఖంగా నాగబాబుగా పిలువబడే ఆయనకు ఆంధ్రప్రదేశ్ ప్రభుత్వం కేబినెట్ హోదా కల్పించింది. ఏపీ గ్రీన్ ఎగ్జిక్యూటివ్ కమిటీ ఛైర్మన్‌గా కొనసాగుతున్న నాగబాబుకు కేబినెట్ హోదా కల్పిస్తూ ప్రభుత్వం తాజాగా ఉత్తర్వులు జారీ చేసింది. దీంతో ఆయనకు కేబినెట్ హోదాకు సంబంధించిన అధికారిక ప్రయోజనాలు, సౌకర్యాలు అందనున్నాయి.

నాగబాబు వేతన భత్యాలు, సిబ్బంది నియామకం, ఇతర ప్రయోజనాలకు సంబంధించిన నిబంధనలను ప్రభుత్వం ఖరారు చేసింది. ఉత్తర్వుల అమలుకు అవసరమైన తదుపరి చర్యలు చేపట్టాలని పర్యావరణ, అటవీశాఖ ఉన్నతాధికారులను ఆదేశించింది. జనసేనలో కీలక నేతగా ఉన్న నాగబాబుకు కేబినెట్ హోదా కల్పించడం ఏపీ రాజకీయ వర్గాల్లో ప్రాధాన్యం సంతరించుకుంది.