అభిజీత్ దీప్కే లాంటి వాళ్లు వస్తారు - కేంద్ర మంత్రి పీయూష్ గోయల్

విదేశాల్లో ఉన్న భారతీయ ప్రతిభావంతులను స్వదేశానికి తిరిగి రప్పించేందుకు ఎలాంటి చర్యలు తీసుకోవాలనే అంశంపై కేంద్ర వాణిజ్య, పరిశ్రమల శాఖ మంత్రి పీయూష్ గోయల్ కీలక వ్యాఖ్యలు చేశారు. జర్మనీలోని బెర్లిన్‌లో భారతీయ పరిశోధకులు, విద్యార్థులతో జరిగిన సమావేశంలో ఆయన మాట్లాడారు. ప్రభుత్వ నిధులతో విద్యార్థులకు ఉపకార వేతనాలు అందించే అంశాన్ని ప్రస్తావిస్తూ, సీజేపీ నేత అభిజీత్ దీప్కే పేరును ప్రస్తావించారు.

విదేశాల్లో ఉన్న ప్రతిభావంతులైన శాస్త్రవేత్తలు, పరిశోధకులను తిరిగి స్వదేశానికి రప్పించేందుకు చైనా ప్రత్యేక కార్యక్రమాలు నిర్వహిస్తోందని పీయూష్ గోయల్ వివరించారు. భారతదేశం కూడా అలాంటి కార్యక్రమాలను పరిశీలించవచ్చని, అయితే ప్రజాస్వామ్య వ్యవస్థలో వాటిని అమలు చేసేటప్పుడు కొన్ని అంశాలను పరిగణనలోకి తీసుకోవాల్సి ఉంటుందని చెప్పారు. 'మనం ఇలాంటి కార్యక్రమాన్ని చేపడితే, అభిజీత్ దీప్కే లాంటి వాళ్లు వచ్చి విద్యార్థులకు ఉపకార వేతనాలు ఇవ్వడం ప్రభుత్వ బాధ్యత కాదా? మనం సొంతంగా ఎందుకు చేసుకోవాలని ప్రశ్నిస్తారు. దురదృష్టవశాత్తూ ఇలాంటి వ్యక్తులు వచ్చి మన ఆలోచనలను గందరగోళానికి గురిచేస్తారు' అని గోయల్ వ్యాఖ్యానించారు

చైనాలో విదేశీ ప్రతిభావంతులను తిరిగి రప్పించే కార్యక్రమాలపై గోయల్ మాట్లాడుతూ, అక్కడి వ్యవస్థకు, భారత ప్రజాస్వామ్యానికి మధ్య తేడా ఉందని పేర్కొన్నారు . చైనాలో ప్రభుత్వ విధానాల దుర్వినియోగంపై ప్రజలు భయపడే పరిస్థితులు ఉండవచ్చని, భారత్‌లో మాత్రం అలాంటి పథకాలను అమలు చేసేటప్పుడు ప్రజాస్వామ్య విలువలను కాపాడాల్సి ఉంటుందని వ్యాఖ్యానించారు. నియంతృత్వానికి, ప్రజాస్వామ్యానికి మధ్య ఉన్న తేడాను గుర్తించి నిర్ణయాలు తీసుకోవాల్సి ఉంటుందన్నారు.