సీఎం రేవంత్ రెడ్డికి రఘునందన్ రావు సవాల్..

రఘునందన్ రావు తెలంగాణ ముఖ్యమంత్రి రేవంత్ రెడ్డి కి బహిరంగ సవాల్ విసిరారు. తెలంగాణకు చెందిన ఎనిమిది మంది బీజేపీ ఎంపీలు రాజీనామా చేసేందుకు సిద్ధంగా ఉన్నారని పేర్కొంటూ, సీఎం కూడా తన పదవికి రాజీనామా చేసి శాసనసభను రద్దు చేసి ఎన్నికలకు రావాలని సవాల్ చేశారు. ప్రజల తీర్పుతో ఎవరు గెలుస్తారో తేల్చుకుందామని అన్నారు.

రాజకీయంగా ప్రజాక్షేత్రంలోనే బలం నిరూపించుకోవాలని పేర్కొన్న రఘునందన్ రావు, బీజేపీ నాయకులపై జరుగుతున్న విమర్శలను కూడా ప్రస్తావించారు. ముఖ్యమంత్రి పదవికి తాము గౌరవం ఇస్తున్నామని, అయితే తమ సంస్కారాన్ని చేతకానితనంగా భావించవద్దని హెచ్చరించారు. ప్రజల మద్దతుపై నమ్మకం ఉంటే తన సవాల్‌ను స్వీకరించాలని రేవంత్ రెడ్డిని కోరారు.