బీజేపీ నిర్ణయాలపై ఎమ్మెల్యే రాజాసింగ్ ఫైర్

గోషామహల్ బీజేపీ ఎమ్మెల్యే టి. రాజాసింగ్ పార్టీ వ్యూహంపై పలు వ్యాఖ్యలు చేశారు. ఈటల రాజేందర్, బండి సంజయ్ ఒక్కటైతేనే బీజేపీ తెలంగాణలో అధికారంలోకి వస్తుందని భావించడం సరైంది కాదని అన్నారు. పార్టీలో సీనియర్ నాయకులు, కార్యకర్తల పాత్రను కూడా సమానంగా పరిగణించాల్సిన అవసరం ఉందని పేర్కొన్నారు. క్షేత్రస్థాయిలో పార్టీ బలపడితేనే ప్రజల విశ్వాసాన్ని పొందగలమని అభిప్రాయపడ్డారు.

మూడు కార్పొరేషన్ మేయర్ పదవులు గెలవడమే లక్ష్యం కాకూడదని, ఒక కార్పొరేషన్‌లో కనీసం సగం స్థానాలు గెలిచి పార్టీ బలాన్ని నిరూపించాలని రాజాసింగ్ అన్నారు. బీజేపీ నాయకుడు రాంచందర్‌రావుకు స్వేచ్ఛగా పనిచేసే అవకాశం కల్పించాలని సూచించారు. పార్టీ అధిష్ఠానం ఒక్క నాయకుడిని దృష్టిలో పెట్టుకుని నిర్ణయాలు తీసుకోకుండా, మొత్తం పార్టీ ప్రయోజనాలను దృష్టిలో ఉంచుకుని ముందుకు సాగాలని ఆయన వ్యాఖ్యానించారు.