టీఎంసీ నాయకత్వంపై తిరుగుబాటు స్వరం

టీఎంసీ పార్టీలో అంతర్గత విభేదాలు మరింత తీవ్రమయ్యాయి. మమతా బెనర్జీ మేనల్లుడు అభిషేక్ బెనర్జీపై రెబల్ నేత రితబ్రత బెనర్జీ తీవ్ర ఆరోపణలు చేశారు. అభిషేక్ వల్లే పార్టీలో అంతర్గత తిరుగుబాటు జరుగుతోందని, ఆయన పెత్తనాన్ని తాము అంగీకరించబోమని స్పష్టం చేశారు. మమతా బెనర్జీని గౌరవిస్తున్నామని, కానీ అభిషేక్‌కు ఉన్నత స్థానం ఇవ్వడాన్ని విమర్శించారు.

బెంగాల్ ఎన్నికల అనంతరం జరిగిన సమావేశాల్లో కూడా వివాదాస్పద అంశాలు చోటుచేసుకున్నాయని రితబ్రత ఆరోపించారు. పార్టీలో అవినీతి పెరిగిందని, ప్రక్షాళన అవసరమని వ్యాఖ్యానించారు. ప్రస్తుతం పలువురు ఎమ్మెల్యేలు తమతో ఉన్నారని, భవిష్యత్తులో మరికొందరు చేరే అవకాశం ఉందని ఆయన తెలిపారు. దీంతో టీఎంసీలో నాయకత్వంపై చర్చ మరింత వేడెక్కింది.