రోడ్డు ధ్వంసం చేసిన వారిపై కఠిన చర్యలు తీసుకోండి: పవన్ కల్యాణ్

తిరుపతి జిల్లా పుల్లంపేట మండలంలోని అనంతసముద్రం నుంచి పాపక్కగారిపల్లెకు వెళ్లే బీటీ రోడ్డును వైకాపా నాయకులు ధ్వంసం చేయడంపై ఆంధ్రప్రదేశ్ ఉప ముఖ్యమంత్రి పవన్ కల్యాణ్ తీవ్ర ఆగ్రహం వ్యక్తం చేశారు. ఈ ఘటనను తీవ్రంగా పరిగణించిన ఆయన.. పంచాయతీరాజ్, గ్రామీణాభివృద్ధి శాఖల ఇంజినీరింగ్ ఉన్నతాధికారులతో సమీక్ష నిర్వహించారు. ప్రభుత్వ ఆస్తులను ధ్వంసం చేసినట్లు ఆరోపణలు ఎదుర్కొంటున్న వైకాపా నాయకుడు సుబ్బారెడ్డిపై చట్ట ప్రకారం కఠిన చర్యలు తీసుకోవాలని అధికారులను ఆదేశించారు. వారం రోజుల క్రితం పల్లె పండుగ కార్యక్రమంలో భాగంగా రూ.4.75 కోట్లతో నిర్మించిన ఈ రోడ్డును సుబ్బారెడ్డి, వెంకటసుబ్బారెడ్డి కలిసి ట్రాక్టర్‌తో సుమారు 100 మీటర్ల మేర దున్నేసినట్లు అధికారులు వివరించారు. గ్రామస్థుల ఫిర్యాదు మేరకు ఇప్పటికే ఎఫ్‌ఐఆర్ నమోదు చేసినట్లు వెల్లడించారు.

ప్రజల సౌకర్యార్థం ప్రభుత్వ నిధులతో నిర్మించిన రహదారిని ధ్వంసం చేయడం క్షమించరాని నేరమని పవన్ కల్యాణ్ స్పష్టం చేశారు. ఈ ఘటనలో నిందితులపై బెయిల్ పొందడం కష్టతరమయ్యే చట్టపరమైన సెక్షన్ల కింద కేసులు నమోదు చేయాలని అధికారులను ఆదేశించారు. ప్రజాధనంతో నిర్మించిన రహదారిని ధ్వంసం చేయడం బాధ్యతారాహిత్యమైన చర్యగా అభివర్ణించారు. ఈ ఘటనకు పాల్పడిన వారితో పాటు, వారి వెనుక ఉండి ప్రోత్సహించిన వారిని కూడా గుర్తించి చట్టం ముందు నిలబెట్టాలని స్పష్టం చేశారు. ప్రభుత్వ ఆస్తుల పరిరక్షణ విషయంలో ఎలాంటి నిర్లక్ష్యానికి తావివ్వకూడదని అధికారులకు సూచించారు.