విజయ్ నియామకంపై పరోక్ష విమర్శలా ?

తమిళనాడు ముఖ్యమంత్రి విజయ్ తన వ్యక్తిగత జ్యోతిష్కుడిగా ప్రచారంలో ఉన్న పండిట్ వెట్రివేల్‌ను ప్రత్యేక విధుల అధికారిగా నియమించారనే వార్తల తర్వాత కాంగ్రెస్ ఎంపీ కార్తీ చిదంబరం చేసిన సోషల్ మీడియా పోస్టు రాజకీయ వర్గాల్లో చర్చనీయాంశమైంది. “కాలిగులా – ఇన్సిటాటస్” అంటూ ఆయన చేసిన పోస్టు ఇప్పుడు తమిళనాడు రాజకీయాల్లో హాట్ టాపిక్‌గా మారింది. రోమన్ చక్రవర్తి కాలిగులా తన ఇష్టమైన గుర్రాన్ని కీలక పదవికి నియమించాలనుకున్న కథతో ఈ వ్యాఖ్యలను అనుసంధానిస్తూ రాజకీయ విశ్లేషకులు చర్చిస్తున్నారు.

కాంగ్రెస్ పార్టీ తమిళనాడులో విజయ్ పార్టీకి మిత్రపక్షంగా ఉన్న సమయంలో ఈ పోస్టు రావడం మరింత ఆసక్తిని పెంచింది. ఇది విజయ్ తీసుకున్న నిర్ణయంపై పరోక్ష విమర్శనా? లేక సాధారణ చారిత్రక వ్యాఖ్యనా? అన్న దానిపై సోషల్ మీడియాలో పెద్ద ఎత్తున చర్చ జరుగుతోంది. మరోవైపు విజయ్ అభిమానులు మాత్రం ఈ వ్యాఖ్యలను తీవ్రంగా తప్పుబడుతున్నారు.