మాటిస్తే నిలబడతాం.. ఎంతటి కష్టాన్నైనా ఎదుర్కొంటాం: కొండా సురేఖ, కొండా మురళి

మాటిస్తే నిలబడతామని, ఎంతటి కష్టాన్నైనా ఎదుర్కొనేందుకు సిద్ధంగా ఉంటామని మాజీ మంత్రి కొండా సురేఖ, ఆమె భర్త కొండా మురళి పేర్కొన్నారు. ఈ మేరకు కొండా సురేఖ సోషల్ మీడియాలో ఓ వీడియోను షేర్ చేశారు. అందులో కొండా మురళి మాట ఇస్తే తల తాకట్టు పెట్టయినా హామీని నెరవేరుస్తారని సురేఖ అన్నారు. ఇచ్చిన మాట కోసం అవసరమైతే ఆస్తి అమ్మి అయినా పని పూర్తి చేస్తారని పేర్కొన్నారు.

ఇటీవల కొండా సురేఖను తెలంగాణ మంత్రివర్గం నుంచి బర్తరఫ్ చేసిన నేపథ్యంలో ఆమె చేసిన ఈ వ్యాఖ్యలు ప్రాధాన్యం సంతరించుకున్నాయి. ప్రస్తుతం ఆమె వరంగల్ తూర్పు ఎమ్మెల్యేగా కొనసాగుతున్నారు. తాజా సోషల్ మీడియా వీడియోపై రాజకీయ వర్గాల్లో చర్చ జరుగుతోంది. ఎలాంటి పరిస్థితులు ఎదురైనా ఇచ్చిన మాటను నిలబెట్టుకుంటామనే ధృఢ వైఖరిని కొండా దంపతులు వ్యక్తం చేశారు.