బిగ్ బాస్ తెలుగు 10లో ఆ 10 మంది.. వైరల్ అవుతున్న కంటెస్టెంట్ల లిస్ట్

బిగ్ బాస్ తెలుగు 10వ సీజన్ గ్రాండ్ ఓపెనింగ్‌కు సిద్ధమవుతోంది. సెప్టెంబర్ 6న సాయంత్రం 7 గంటలకు ఈ షో ప్రారంభం కానుండగా, అక్కినేని నాగార్జున మరోసారి హోస్ట్‌గా ప్రేక్షకులను అలరించనున్నారు. 10వ సీజన్ కావడంతో నిర్వాహకులు ‘దశావతారం’ అనే ప్రత్యేక కాన్సెప్ట్‌ను తీసుకొస్తున్నట్లు తెలుస్తోంది. ఈసారి తొలుత 10 మంది కంటెస్టెంట్లను హౌస్‌లోకి పంపనున్నట్లు ప్రచారం జరుగుతోంది. చైత్ర రాయ్, వర్షిణి సౌందరజన్, ముఖేష్ గౌడ, నటుడు కృష్ణుడు, టెంపర్ వంశీ, జబర్దస్త్ ఫేమ్ నరేష్, రామ్‌ప్రసాద్, ‘చెన్నై లవ్ స్టోరీ’ నటుడు అదిత్ అరుణ్, దేబ్జానీ మోదక్, యూట్యూబర్ సుధీర్ రెడ్డి పేర్లు ప్రస్తుతం సోషల్ మీడియాలో వైరల్ అవుతున్నాయి.

అయితే ఈ పేర్లను బిగ్ బాస్ నిర్వాహకులు ఇప్పటివరకు అధికారికంగా ప్రకటించలేదు. సాధారణంగా కంటెస్టెంట్ల విషయంలో చివరి వరకు సస్పెన్స్ కొనసాగించే షో కావడంతో చివరి నిమిషంలో మార్పులు జరిగే అవకాశం ఉంది. సీజన్ కొనసాగుతున్న సమయంలో మిడ్ వీక్, వైల్డ్ కార్డ్ ఎంట్రీల ద్వారా మరికొందరిని హౌస్‌లోకి తీసుకురావాలని ప్లాన్ చేస్తున్నట్లు సమాచారం. సామాన్యులకు కూడా అవకాశం కల్పించేందుకు ‘అగ్ని పరీక్ష’ పేరుతో టాలెంట్ హంట్ నిర్వహించారు. సెలబ్రిటీలతో పాటు కామన్ పీపుల్ కూడా గేమ్‌లోకి వస్తే ఈ సీజన్ మరింత ఆసక్తికరంగా మారే అవకాశం ఉంది.