అగ్నిపరీక్ష నుంచి బిగ్‌బాస్‌ హౌస్‌కు వెళ్లేది వీళ్లేనా?

బిగ్‌బాస్‌ తెలుగు 10 సెప్టెంబర్‌ 6న ప్రారంభం కానుండటంతో.. అగ్నిపరీక్ష నుంచి హౌస్‌లోకి అడుగుపెట్టే కంటెస్టెంట్లు ఎవరనే దానిపై ఆసక్తి నెలకొంది. గత సీజన్‌లో ఐదు లేదా ఆరుగురిని ఎంపిక చేసిన విధంగా ఈసారి కూడా పరిమిత సంఖ్యలోనే పంపిస్తారా? లేక అగ్నిపరీక్ష నుంచి ఎక్కువ మందిని తీసుకుంటారా? అనే చర్చ జరుగుతోంది. సెలబ్రిటీలతో పాటు అగ్నిపరీక్ష నుంచి మరో పది మంది కంటెస్టెంట్లను తీసుకునే అవకాశం ఉందనే లీకులు వినిపిస్తున్నాయి. మూడు గ్రీన్స్‌ సాధించిన మిథిలేష్‌, చరణ్‌, రాజ కుమారి దాదాపు ఖరారైనట్లు ప్రచారం జరుగుతోంది. వీరితో పాటు రోహిత్‌, ఝాన్సీ, అమన్‌, శ్రష్టి, షాలినీ పేర్లు కూడా వినిపిస్తున్నాయి. అయితే తుది జాబితా, అగ్నిపరీక్ష నుంచి ఎంతమందిని ఎంపిక చేస్తారనే విషయం గ్రాండ్‌ లాంచ్‌లోనే స్పష్టమయ్యే అవకాశం ఉంది.

మరోవైపు బిగ్‌బాస్‌ తెలుగు 10లోకి సీరియల్‌ నటులు దేబ్జానీ, ముఖేష్‌ గౌడ, జబర్దస్త్‌ కమెడియన్లు రామ్‌ ప్రసాద్‌, నరేశ్‌, యాంకర్‌ వర్షిణి, సీరియల్‌ నటి చైత్రా రాయ్‌, ‘వినాయకుడు’ ఫేమ్‌ కృష్ణుడు, ఆధాన్‌ టాక్స్‌ సుధీర్‌ రెడ్డి, అదిత్‌ ఈశ్వరన్‌, టెంపర్‌ వంశీ వంటి పేర్లు కూడా ప్రచారంలో ఉన్నాయి. వీరికి సంబంధించిన ఏవీలు, డ్యాన్స్‌ పర్ఫార్మెన్స్‌ల షూటింగ్‌ పూర్తయినట్లు సమాచారం. హోస్ట్‌ నాగార్జున చేయనున్న బిగ్‌బాస్‌ హోమ్‌ టూర్‌ షూట్‌ కూడా పూర్తయినట్లు తెలుస్తోంది. ఆదివారం సాయంత్రం 7 గంటలకు గ్రాండ్‌ లాంచ్‌ జరగనుండటంతో.. అధికారికంగా హౌస్‌లోకి వెళ్లే కంటెస్టెంట్లు ఎవరనేది అప్పుడే తేలనుంది.