డ్రంక్ డ్రైవ్ కేసులో డేవిడ్ వార్నర్

ఆస్ట్రేలియా క్రికెటర్ డేవిడ్ వార్నర్ డ్రంక్ అండ్ డ్రైవ్ కేసులో చిక్కుకోవడంతో మరోసారి వార్తల్లో నిలిచాడు. ఈస్టర్ సండే రోజున స్నేహితుడి ఇంట్లో మూడు గ్లాసుల వైన్ తాగిన అనంతరం ఉబర్ క్యాబ్‌ను బుక్ చేసుకోవాల్సింది పోయి స్వయంగా కారు నడపడం తన తప్పేనని వార్నర్ తరఫు న్యాయవాది బాబీ హిల్ కోర్టుకు తెలిపారు. ఏప్రిల్ 5న సిడ్నీ తూర్పు ప్రాంతంలో పోలీసులు నిర్వహించిన బ్రీత్ టెస్ట్‌లో వార్నర్ ఆల్కహాల్ సేవించినట్లు తేలడంతో ఆయనను మరోబ్రా పోలీస్ స్టేషన్‌కు తరలించారు. అక్కడ నిర్వహించిన పరీక్షల్లో రక్తంలో ఆల్కహాల్ స్థాయి 0.104గా నమోదై, ఆస్ట్రేలియా చట్టపరమైన పరిమితిని రెండింతలు మించిందని అధికారులు వెల్లడించారు.

పాకిస్తాన్ సూపర్ లీగ్‌లో కరాచీ కింగ్స్‌కు కెప్టెన్‌గా వ్యవహరించిన అనంతరం సెలవుల కోసం సిడ్నీకి వచ్చిన సమయంలో ఈ ఘటన చోటుచేసుకుంది. ప్రస్తుతం న్యూ సౌత్ వేల్స్ ప్రభుత్వం డ్రంక్ అండ్ డ్రైవ్ వ్యతిరేక అవగాహన కార్యక్రమంలో భాగస్వామిగా ఉన్న సిడ్నీ థండర్స్ జట్టుకు వార్నర్ కెప్టెన్‌గా కొనసాగుతుండటంతో ఈ ఘటన తీవ్ర చర్చకు దారితీసింది. 2018 బాల్ టాంపరింగ్ వివాదం తర్వాత నాయకత్వంపై నిషేధాన్ని ఎదుర్కొన్న వార్నర్‌కు 2024లో మళ్లీ కెప్టెన్సీ అవకాశం లభించగా, తాజా కేసు నేపథ్యంలో ఆయన నాయకత్వంపై సిడ్నీ థండర్స్ యాజమాన్యం ఎలాంటి నిర్ణయం తీసుకుంటుందనే అంశంపై ఆసక్తి నెలకొంది.