పారా బ్యాడ్మింటన్‌లో భారత్‌ జోరు..

పారా బ్యాడ్మింటన్‌లో భారత క్రీడాకారులు అద్భుత ప్రదర్శనతో అదరగొట్టారు. పురుషుల సింగిల్స్‌ ఎస్‌ఎల్‌3 విభాగంలో ప్రమోద్‌ భగత్‌, నితేశ్‌ కుమార్‌ ఫైనల్‌కు చేరుకోవడంతో భారత్‌కు కనీసం ఒక స్వర్ణ పతకం ఖాయమైంది. సెమీఫైనల్లో భగత్‌ 16-21, 21-18, 21-17తో కొరియాకు చెందిన లీపై విజయం సాధించాడు. మరో సెమీఫైనల్లో నితేశ్‌ 21-19, 21-16తో ఇండోనేసియాకు చెందిన ఇమ్రాన్‌ను ఓడించి తుది పోరుకు అర్హత సాధించాడు. దీంతో ఎస్‌ఎల్‌3 పురుషుల సింగిల్స్‌ టైటిల్‌ కోసం ఇద్దరు భారత ఆటగాళ్లు తలపడనున్నారు.

మిక్స్‌డ్‌ డబుల్స్‌లోనూ ఫైనల్‌కు నితేశ్‌–తులసిమతి

నితేశ్‌ కుమార్‌ మిక్స్‌డ్‌ డబుల్స్‌లో తులసిమతితో కలిసి ఫైనల్‌కు చేరుకున్నాడు. సెమీఫైనల్లో ఈ భారత జోడీ 21-19, 14-21, 21-17తో చైనాకు చెందిన మింగ్‌పిన్‌, జుక్సియాన్‌ జంటపై విజయం సాధించింది. మరోవైపు పురుషుల సింగిల్స్‌ ఎస్‌ఎల్‌4 విభాగంలో నవీన్‌ శివకుమార్‌ కూడా ఫైనల్‌కు అర్హత సాధించాడు. వరుస విజయాలతో భారత ఆటగాళ్లు పతకాల వేటలో దూసుకెళ్తుండటంతో పారా బ్యాడ్మింటన్‌లో దేశానికి మరిన్ని పతకాలు వచ్చే అవకాశాలు మెరుగయ్యాయి.