జింబాబ్వేపై టీమిండియా ఘన విజయం..

జింబాబ్వేతో జరిగిన రెండో టీ20లో భారత మహిళల క్రికెట్‌ జట్టు అదరగొట్టింది. రాయ్‌పూర్‌ వేదికగా జరిగిన ఈ మ్యాచ్‌లో 9 వికెట్ల తేడాతో ఘన విజయం సాధించి, మూడు మ్యాచ్‌ల సిరీస్‌ను మరో మ్యాచ్‌ మిగిలి ఉండగానే 2–0తో కైవసం చేసుకుంది. టాస్‌ గెలిచి తొలుత బ్యాటింగ్‌ చేసిన జింబాబ్వే.. భారత బౌలర్ల ధాటికి 20 ఓవర్లలో 8 వికెట్ల నష్టానికి 102 పరుగులే చేసింది. చిపో ముగేరి-తిరిపానో 34 పరుగులు, కెప్టెన్‌ జోసెఫిన్‌ ఎన్కోమో 27 పరుగులతో రాణించారు. భారత బౌలర్లలో నికీ ప్రసాద్‌ రెండు వికెట్లు తీయగా, శ్రీచరణి, నందని శర్మ, దీప్తి శర్మ, క్రాంతి గౌడ్‌ తలో వికెట్‌ పడగొట్టారు.

అనంతరం 103 పరుగుల లక్ష్యంతో బరిలోకి దిగిన భారత్‌ కేవలం 8.5 ఓవర్లలోనే ఒక వికెట్‌ కోల్పోయి లక్ష్యాన్ని ఛేదించింది. ఓపెనర్‌ షెఫాలీ వర్మ 55 పరుగులతో అర్ధశతకం సాధించగా, కెప్టెన్‌ స్మృతి మందనా 47 పరుగులతో అజేయంగా నిలిచింది. వీరిద్దరి దూకుడుతో భారత జట్టు అలవోకగా విజయాన్ని అందుకుంది. హర్మన్‌ప్రీత్‌ కౌర్‌ నుంచి పూర్తి స్థాయి కెప్టెన్సీ బాధ్యతలు చేపట్టిన తర్వాత స్మృతి మందనాకు ఇదే తొలి టీ20 సిరీస్‌ కాగా, తొలి సిరీస్‌లోనే జట్టును విజయపథంలో నడిపించింది.