ప్రపంచ అండర్‌-19 బాక్సింగ్‌ ఛాంపియన్‌షిప్‌లో భారత్‌కు తొలి పతకం ఖాయం చేసిన ప్రాచి టోకస్‌

ప్రపంచ అండర్‌-19 బాక్సింగ్‌ ఛాంపియన్‌షిప్‌లో భారత బాక్సర్‌ ప్రాచి టోకస్‌ దేశానికి తొలి పతకాన్ని ఖాయం చేసింది. మహిళల 80 కేజీలకు పైబడిన విభాగంలో సమోవాకు చెందిన కీలీ పెరెజ్‌పై విజయం సాధించి సెమీఫైనల్‌కు చేరుకుంది. దీంతో భారత్‌కు కనీసం కాంస్య పతకం ఖరారైంది. తదుపరి సెమీఫైనల్‌లో రష్యా బాక్సర్‌ సమీరా ఇటోనియేవాతో ప్రాచి తలపడనుంది. ఈ పోటీలో గెలిచి ఫైనల్‌కు చేరుకోవడమే లక్ష్యంగా ఆమె బరిలోకి దిగనుంది.

ఇదే ఛాంపియన్‌షిప్‌లో భారత బాక్సర్లు హర్షిక, లక్షు కూడా కీలక విజయాలు సాధించారు. మహిళల 65 కేజీల విభాగంలో హర్షిక ఆస్ట్రేలియాకు చెందిన టియానా రెవ్‌పై 4–0 తేడాతో గెలిచి క్వార్టర్‌ఫైనల్‌కు చేరుకుంది. 70 కేజీల విభాగంలో లక్షు టర్కీకి చెందిన బుసే నూర్‌ యహాన్‌ను 3–2తో ఓడించి తదుపరి దశకు అర్హత సాధించింది. ఈ విజయాలతో అంతర్జాతీయ వేదికపై భారత యువ బాక్సర్లు తమ సత్తా చాటుతున్నారు.