బీసీసీఐ సెలక్షన్ కమిటీ ఛైర్మన్‌గా ప్రజ్ఞాన్ ఓజా?

అజిత్ అగార్కర్ నిష్క్రమణ తర్వాత వెస్ట్‌జోన్ సెలక్టర్ పదవికి పార్థివ్ పటేల్ దరఖాస్తు చేసుకుంటాడని పలువురు భావించారు. అయితే, అతడు ఈ పదవి కోసం దరఖాస్తు చేయకపోవడంతో ప్రజ్ఞాన్ ఓజా పూర్తి స్థాయి సెలక్షన్ కమిటీ ఛైర్మన్‌గా కొనసాగే అవకాశాలు మెరుగుపడ్డాయి. అగార్కర్ వైదొలిగిన తర్వాత ఓజా తాత్కాలికంగా కమిటీకి నాయకత్వం వహిస్తున్నాడు. ప్రస్తుతం సెలక్షన్ కమిటీలో ఉన్న సభ్యుల్లో అత్యధిక టెస్టు మ్యాచ్‌లు ఆడిన అనుభవం ఓజాకే ఉంది.

వెస్ట్‌జోన్ సెలక్టర్ పదవికి దరఖాస్తు చేసుకునే గడువు బుధవారంతో ముగిసింది. ఈ పదవి కోసం మాజీ భారత క్రికెటర్లు రమేశ్ పొవార్, సమీర్ దిఘే కూడా దరఖాస్తు చేసుకున్నట్లు సమాచారం. పార్థివ్ పటేల్ పోటీకి దూరంగా ఉండటంతో తదుపరి నియామకంపై ఆసక్తి నెలకొంది. అయితే, ప్రజ్ఞాన్ ఓజాను పూర్తి స్థాయి ఛైర్మన్‌గా నియమిస్తారా లేదా అన్నది బీసీసీఐ అధికారిక నిర్ణయం తర్వాతే స్పష్టత రానుంది.