బీసీసీఐ చీఫ్ సెలెక్టర్‌గా ప్రజ్ఞాన్ ఓజా

భారత క్రికెట్ నియంత్రణ మండలి (బీసీసీఐ) సీనియర్ పురుషుల సెలక్షన్ కమిటీలో మార్పులు ప్రకటించింది. మాజీ స్పిన్నర్ ప్రజ్ఞాన్ ఓజాను కమిటీ కొత్త ఛైర్మన్‌గా నియమించింది. అజిత్ అగార్కర్ పదవీకాలం ముగియడంతో ఆయన స్థానంలో ప్రజ్ఞాన్ ఓజా బాధ్యతలు చేపట్టనున్నారు. అత్యధిక టెస్టు మ్యాచ్‌లు ఆడిన సీనియారిటీ ఆధారంగా ఓజాను ఛైర్మన్‌గా ఎంపిక చేసినట్లు బీసీసీఐ వెల్లడించింది. మాజీ స్పిన్నర్ రమేష్ పొవార్‌ను కూడా సెలక్షన్ కమిటీ సభ్యుడిగా నియమించింది.

కొత్తగా ఏర్పాటైన ఐదుగురు సభ్యుల కమిటీలో ప్రజ్ఞాన్ ఓజా ఛైర్మన్‌గా, శివ్ సుందర్ దాస్, ఆర్‌పీ సింగ్, అజయ్ రాత్రా, రమేష్ పొవార్ సభ్యులుగా కొనసాగనున్నారు. 2023 జూలై నుంచి చీఫ్ సెలెక్టర్‌గా సేవలందించిన అజిత్ అగార్కర్‌కు బీసీసీఐ కృతజ్ఞతలు తెలిపింది. ఆయన నిబద్ధత, నిర్ణయాత్మక వైఖరి, భారత క్రికెట్‌కు అందించిన సేవలను ప్రశంసించింది. రాబోయే అంతర్జాతీయ సిరీస్‌లు, 2027 వన్డే ప్రపంచకప్ నేపథ్యంలో ఈ కమిటీ ఎంపికలు కీలకం కానున్నాయి.