అకాయ్‌ స్కూల్‌ రీల్‌.. విరాట్‌కు శుభ్‌మన్‌ గిల్‌ ఫన్నీ రిప్లై...

భారత క్రికెట్‌లో విరాట్‌ కోహ్లీకి ఉన్న క్రేజ్‌ గురించి ప్రత్యేకంగా చెప్పాల్సిన అవసరం లేదు. యువ కెప్టెన్‌ శుభ్‌మన్‌ గిల్‌ కూడా తన ఆటతో పాటు సరదా స్పందనలతో అభిమానులను ఆకట్టుకుంటుంటాడు. తాజాగా విరాట్‌ కోహ్లీ కుమారుడు అకాయ్‌ను ఉద్దేశించి ఓ ఇన్‌ఫ్లూయెన్సర్‌ చేసిన సరదా రీల్‌కు గిల్‌ ఇచ్చిన స్పందన సోషల్‌ మీడియాలో వైరల్‌గా మారింది. ఆ రీల్‌లో సదరు ఇన్‌ఫ్లూయెన్సర్‌ అకాయ్‌కు టీచర్‌గా నటిస్తూ.. అతడి తల్లిదండ్రులను స్కూల్‌కు తీసుకురావాలని సరదాగా చెప్పింది.

ఈ రీల్‌ను చూసిన గిల్‌.. విరాట్‌ను ఉద్దేశిస్తూ ‘బ్రదర్‌.. కంగారొద్దు. నేను చూసుకుంటా’ అంటూ ఫన్నీగా కామెంట్‌ చేశాడు. దీనికి ఇన్‌ఫ్లూయెన్సర్‌ కూడా స్పందిస్తూ.. ‘సోమవారం ఉదయం 11 గంటలకు కలవండి. డైరీని మరిచిపోవద్దు’ అంటూ సరదాగా బదులిచ్చింది. దీంతో ఈ కామెంట్లపై నెటిజన్లు పెద్ద ఎత్తున స్పందిస్తున్నారు. అకాయ్‌కు గిల్‌ బాబాయ్‌ అయిపోయాడంటూ అభిమానులు సరదా కామెంట్లు చేస్తుండటంతో ఈ వీడియో సోషల్‌ మీడియాలో వైరల్‌గా మారింది.