జింబాబ్వేతో టీ20 సిరీస్‌.. కెప్టెన్‌గా స్మృతి మంధానకు తొలి పరీక్ష!

భారత మహిళల క్రికెట్‌లో కొత్త అధ్యాయం ప్రారంభం కానుంది. పదేళ్ల పాటు జట్టుకు సారథ్యం వహించిన హర్మన్‌ప్రీత్‌ కౌర్‌ స్థానంలో కెప్టెన్‌గా నియమితురాలైన స్టార్‌ ఓపెనర్‌ స్మృతి మంధాన.. జింబాబ్వేతో జరిగే మూడు టీ20ల సిరీస్‌తో పూర్తి స్థాయి కెప్టెన్‌గా తన ప్రయాణాన్ని ప్రారంభించనుంది. గతంలో హర్మన్‌ప్రీత్‌ అందుబాటులో లేనప్పుడు కొన్ని మ్యాచ్‌లకు సారథ్యం వహించిన అనుభవం స్మృతికి ఉంది. అయితే, ఇప్పుడు పూర్తి స్థాయి కెప్టెన్‌గా ఆమె జట్టును ఎలా నడిపిస్తుందన్నది ఆసక్తికరంగా మారింది. హర్మన్‌ప్రీత్‌ కెప్టెన్సీ బాధ్యతల నుంచి తప్పుకున్నప్పటికీ ఆటగాడిగా జట్టులో కొనసాగనుంది. స్మృతి, హర్మన్‌ప్రీత్‌, షెఫాలి వర్మ, రిచా ఘోష్‌, దీప్తి శర్మలతో భారత బ్యాటింగ్‌ పటిష్ఠంగా కనిపిస్తోంది. శ్రీచరణి, దీప్తి శర్మ స్పిన్‌ బౌలింగ్‌తో పాటు నందని, క్రాంతి పేస్‌ బౌలింగ్‌ జట్టుకు బలంగా నిలవనున్నాయి. అనుష్క శర్మ, నికి ప్రసాద్‌, కమలిని వంటి యువ ఆటగాళ్లకు తుది జట్టులో అవకాశం దక్కుతుందా అన్నది చూడాలి. జోసెఫిన్‌ సారథ్యంలో బరిలోకి దిగనున్న జింబాబ్వేకు స్వదేశంలో భారత్‌ను ఓడించడం సవాలుతో కూడుకున్నదే.

మరోవైపు, నిర్భయంగా, తెలివిగా క్రికెట్‌ ఆడటమే తమ లక్ష్యమని భారత టీ20 జట్టు వైస్‌ కెప్టెన్‌ షెఫాలి వర్మ వెల్లడించింది. వచ్చే ఏడాది ఛాంపియన్స్‌ ట్రోఫీని దృష్టిలో ఉంచుకుని జట్టు సమావేశాల్లో ఆటగాళ్ల బాధ్యతలు, భవిష్యత్‌ లక్ష్యాలపై చర్చించినట్లు తెలిపింది. ప్రతి సిరీస్‌తో మరింత మెరుగుపడేందుకు ప్రయత్నిస్తున్నామని పేర్కొంది. మాజీ కెప్టెన్‌ హర్మన్‌ప్రీత్‌ కౌర్‌ భారత మహిళల క్రికెట్‌ అభివృద్ధిలో కీలక పాత్ర పోషించిందని షెఫాలి ప్రశంసించింది. ప్రస్తుతం జట్టు ఈ స్థాయికి చేరుకోవడంలో ఆమె కృషి ఎంతో ఉందని పేర్కొంది. వ్యక్తిగతంగా బ్యాటింగ్‌లో నిలకడ సాధించడం, ఫిట్‌నెస్‌ను మెరుగుపరుచుకోవడం, మానసికంగా మరింత దృఢంగా మారడంపై దృష్టి సారిస్తున్నట్లు షెఫాలి వెల్లడించింది. స్మృతి మంధాన నాయకత్వంలో భారత జట్టు ఈ సిరీస్‌ను విజయంతో ప్రారంభించాలని అభిమానులు ఆశిస్తున్నారు.