ఫిఫా ఫైనల్‌కు ట్రంప్ హాజరు

అమెరికా అధ్యక్షుడు డొనాల్డ్ ట్రంప్ ఫిఫా వరల్డ్ కప్ 2026 ఫైనల్‌ను ప్రత్యక్షంగా వీక్షించనున్నారు. అర్జెంటీనా-స్పెయిన్ మధ్య జరిగే ఈ తుది పోరును వీక్షించేందుకు ఆయన న్యూజెర్సీలోని మెట్‌లైఫ్ స్టేడియంకు హాజరుకానున్నట్లు వైట్‌హౌస్ అధికారికంగా ధృవీకరించింది. వైట్‌హౌస్ ప్రెస్ సెక్రటరీ కరోలిన్ లెవిట్ తెలిపిన వివరాల ప్రకారం, ట్రంప్ ముందుగా న్యూయార్క్‌లోని ట్రంప్ టవర్‌లో ఫిఫా ప్రత్యేక కార్యక్రమంలో పాల్గొని అనంతరం ఫైనల్ మ్యాచ్‌ను వీక్షించనున్నారు.

ఫిఫా అధ్యక్షుడు జియానీ ఇన్‌ఫాంటినో కూడా ఫైనల్ అనంతరం ట్రంప్‌తో కలిసి విజేత జట్టుకు ప్రపంచకప్ ట్రోఫీ అందజేయనున్నట్లు ప్రకటించారు. అమెరికా, కెనడా, మెక్సికో సంయుక్తంగా నిర్వహిస్తున్న ఈ టోర్నీలో ఇప్పటివరకు ట్రంప్ లేదా ఉపాధ్యక్షుడు జేడీ వాన్స్ హాజరుకాలేదు. ఇదిలా ఉండగా, ఇటీవల అమెరికా ఆటగాడు ఫోలారిన్ బాలోగన్ సస్పెన్షన్ అంశంపై ట్రంప్, ఇన్‌ఫాంటినో మధ్య జరిగిన చర్చ వివాదాస్పదమైంది. అయితే నిర్ణయ ప్రక్రియలో ఎలాంటి జోక్యం చేసుకోలేదని ఇన్‌ఫాంటినో స్పష్టం చేశారు.